Прэзідэнтка Грузіі заявіла, што не сыдзе ў адстаўку на фоне спробы імпічменту

Саламэ Зурабішвілі адзначыла, што будзе адказваць толькі перад грузінскім народам.

Прэзідэнтка Грузіі Саламэ Зурабішвілі заявіла, што не збіраецца сыходзіць у адстаўку на фоне спробаў кіроўнай партыі абвясціць ёй імпічмент.

Пра гэта яна сказала ў відэазвароце, які прыводзіць тэлеканал Mtavari.

«Я нікуды не сыду... Думаю, усе павінны забыць мару пра маю адстаўку», – падкрэсліла Зурабішвілі.

Яна адзначыла, што будзе адказваць толькі перад грузінскім народам.

«Я адказваю толькі перад вамі, бо вы мяне абралі, і я адчуваю вялікую адказнасць за гэты выбар. Вы абралі мяне за тое, хто я ёсць і была ўсё сваё жыццё – прыхільніцай Еўропы, прыхільніцай еўрапейскай будучыні Грузіі», – падкрэсліла грузінская прэзідэнтка.

На мінулым тыдні «Грузінская мара» абвясціла, што пачынае працэдуру імпічменту Саламэ Зурабішвілі таму, што яна паехала з візітамі, не ўзгодненымі ўрадам.

Урад Грузіі не даў згоды на блізу дзясятка візітаў прэзідэнта, большасць з іх – у Еўропу.

Нягледзячы на гэта, 31 жніўня Саламэ Зурабішвілі ўсё роўна вылецела ў ЕЗ.

Перад ініцыяваннем імпічменту «Грузінская мара» заявіла, што падасць запыт у Канстытуцыйны суд з просьбай вызначыць, ці парушыла Зурабішвілі сваімі візітамі асноўны закон.