«Каб па-чалавечы жыць, нават не шыкаваць, заробак павінен быць ад 1000 даляраў»

Беларус запісаў на відэа размову з дворнікам і ўзрушыў TikTok.

У Гародні TikTokер запісаў на відэа гутарку з мясцовым дворнікам: жанчына паведаміла яму, што на месяц атрымлівае 1000 рублёў. Блогер выклаў відэа ў інтэрнэт, пад ім у каментарах пачалі спрачацца карыстачы, некаторыя адзначалі, што такія грошы плацяць не ўсюды. Праз дзяржаўную базу вакансій «Зеркало» праверыла, якія заробкі прапануюць дворнікам наймальнікі.

TikTokер падышоў да адпачываючай на лаўцы жанчыны дворніка і пацікавіўся сумай яе заробку, тая адказала, што 1000 рублёў на месяц у яе выходзіць.

«Калі нехта правініўся, то можа рублёў 700-800», - паведаміла працаўніца пра самы маленькі заробак дворніка, які могуць заплаціць у іх на прадпрыемстве.

TikTokер задаўся пытаннем, ці трэба ісці вучыцца на 10 балаў, калі дворнікі ў Беларусі атрымліваюць ад 700 да 1200 рублёў.

Карыстачы пакінулі пад відэа больш за 2200 каментараў. Некаторыя адзначылі, што гэта занадта вялікія грошы, маўляў, у іх у рэгіёне столькі за гэтую працу не плацяць. Некаторыя выказаліся, маўляў, гэтая «праца не бі ляжачага». Тыя, хто не пагадзіўся з гэтым сцвярджэннем, удакладнялі, чаму ж тады так шмат вольных месцаў для дворнікаў і ніхто не жадае туды ўладкоўвацца. Вось, што пісалі людзі.

• «Гэта колькі дамоў трэба прыбраць на 1000? У нас шэсць дамоў за 600 рублёў: пачысці снег, увосень лістоту прыбяры. Не хачу і 1000 за такую працу»

• «Вы думаеце, што гэта лёгкая праца? Паспрабуйце снег пакідаць і лісце прыбраць».

• «Іду на працу а 5, яны ўжо ва ўсю снег чысцяць, пасыпаюць. Думаю, яны ўстаюць а гадзіне 3-й ночы».

• «У мяне жонка працуе. У снег з 5.15 і без абеду з шуфлем. Няма чаго тут зайздросціць. Найцяжэйшая праца».

• «Мая мама працавала 10 гадоў дзеля кватэры. Пры першай магчымасці адразу звольнілася. Пякельная праца, асабліва зімой. Страчанае здароўе, грошы смешныя».

• «У Віцебску дворнікі атрымліваюць мінімальны заробак, ад гэтага і двары не прыбраныя. Людзі не хочуць за такую нізкую аплату працаваць, вось і не стае іх».

• «Вы вакансіі ў кожным горадзе перагледзьце, больш за палову агучанага не прапануюць».

• «Працуючы дворнікам пры заробку 1200 рублёў, трэба мець сілы. 19 пад'ездаў прыбраць пасля свят ох цяжкавата».

• «Ведаю толькі, каб па-чалавечы жыць, нават не шыкаваць, заробак павінен быць ад 1000 даляраў, гэта мінімум».

• «Гомель, 650-700 рублёў. Са снегам і лістотай даплата выходзіць 800-850».

Колькі абяцаюць плаціць дворнікам

На сайце дзяржаўнай службы занятасці 16 студзеня былі апублікаваныя 283 вакансіі для дворнікаў. Прыкладна чвэрць з іх прапануюць на няпоўную занятасць. Большасць наймальнікаў паказвае, што супрацоўнік ім патрэбны без шкодных звычак.

На поўную занятасць заробкі дворнікаў пачынаюцца ад 600 рублёў. Такія грошы гатовы плаціць двум дворнікам у Гомельскім мастацкім каледжы.

У раённым ЖРЭУ Бабруйска дворнікаў чакае заробак 600-700 рублёў.

Ёсць наймальнікі, якія паведамляюць, што ў дворніка апроч уборкі будзе яшчэ дадатковая нагрузка. Напрыклад, гомельскае прадпрыемства «Алкапак» хоча, каб супрацоўнік яшчэ ўсталёўваў паштовыя замкі і рабіў дробны бытавы рамонт. За працу яму гатовы плаціць 650-845 рублёў.

Кампанія «Паціа» (уладальнік сеткі крам «5 элемент») абяцае дворніку заробак 700-1000 рублёў. Супрацоўнік патрэбен ахайны, акуратны, адказны, выканаўчы.

У Кіраўніцтве справамі прэзідэнта патрэбныя 20 дворнікаў, ім будуць плаціць 1100-1200 рублёў.

Самы вялікі заробак - 902-1300 рубля - дворніку прапануюць у гандлёвым цэнтры «Сілуэт» у Менску. Працаваць трэба будзе паводле графіку два дні праз два. У абавязкі ўваходзіць уборка прылеглай тэрыторыі і складаванне макулатуры. Супрацоўніку абяцаюць камфортныя ўмовы працы, спецвопратку і неабходны для працы інвентар.