Банк Англіі прэзентаваў першыя банкноты з выявай караля Чарльза

Фотафакт.

Банк Англіі прэзентаваў першыя банкноты з выявай караля Чарльза, яны паступяць у абарачэнне з сярэдзіны 2024 года.

Пра гэта паведамляе Sky News.

На новых палімерных банкнотах наміналам 5, 10, 20 і 50 фунтаў стэрлінгаў на адным баку – партрэт караля Чарльза, а таксама ягоная камея ў празрыстым ахоўным акне. Акрамя гэтых выяваў, новыя банкноты не будуць адрознівацца ад ужо існых.

Плацежныя сродкі паступова заменяць банкноты з выявай памерлай каралевы Лізаветы II, якія будуць забіраць з абарачэння пры іх зношанасці.

«Я вельмі ганаруся тым, што банк выпускае дызайн нашых новых банкнотаў, на якіх будзе намаляваны кароль Чарльз III. Гэта важны момант, паколькі кароль – другі манарх, намаляваны на нашых банкнотах. Людзі змогуць выкарыстоўваць гэтыя новыя купюры, калі яны пачнуць паступаць у абарачэнне ў 2024 годзе», – сказаў кіраўнік Банка Англіі Эндру Бэйлі.

Раней у снежні ў Вялікай Брытаніі паступілі ў абарачэнне манеты коштам 50 пенсаў з партрэтам караля Чарльза III.

Як і ў выпадку з купюрамі, манеты з партрэтам Лізаветы II застануцца законным плацежным сродкам.