Кітай адмовіўся рызыкаваць дзеля Расеі
7- 26.05.2024, 19:52
- 27,994
Важны для Масквы завод спынены.
Былы завод японскай кампаніі Nissan у Ленінградскай вобласці зноў спыніўся і адправіў у прастой больш за 300 супрацоўнікаў: на ім быў анансаваны выпуск расейскай версіі кітайскай мадэлі Тиго7, якая, зрэшты, як і так званыя «Москвичи» ці «Волгі», з'яўляецца чыста кітайскім вырабам з асабліва «карнавальным працэсам» зборкі.
Гэты працэс зводзіцца да праводкі ўжо гатовага аўтамабіля па канвееры з прыклейваннем шыльдаў расейскіх брэндаў у працэсе руху.
Аднак нават у такім фармаце вытворчасць пакуль не можа пачаць звычайную працу, што можна растлумачыць двума фактарамі. Аб гэтым піша расейскі блогер і эканамічны аналітык Анатоль Несміян.
- Па-першае, кітайцы не адчуваюць ніякіх праблем з продажам аўтэнтычных аўтамабіляў на апусцелым расейскім рынку. Па-другое, рост праблем з разлікамі робяць усякі супольны праект справай рызыкоўнай, - адзначыў ён.
Са слоў эксперта, напярэдадні амерыканскі міністр фінансаў Джанэт Елен у інтэрв'ю інфармацыйнаму агенцтву Reuters анансавала новыя «дзейсныя санкцыі» для ўсіх банкаў усіх краін, якія супрацоўнічаюць з Расеяй па правядзенні розных транзакцый.
Кітайскія кампаніі дастаткова сур'ёзна ставяцца да такіх пагроз, бо расейскі рынак для іх - адзін з многіх, прычым не занадта вялікі, бо тавараабарачэнне з Расеяй роўнае тавараабарачэнню, да прыкладу, з В'етнамам, і рызыкаваць вялікім цэлым дзеля малога прыватнага ў КНР не бачаць сэнсу.
Расея займае амаль 4% у замежным гандлі Кітая, таму рызыкаваць сваім становішчам на сусветным рынку Пекін не мае намеру.