Клуні заклікаў Байдэна выратаваць дэмакратыю і выйсці з прэзідэнцкай гонкі
7- 5,856
Паводле словаў акцёра, кіраўнік дзяржавы не ў стане перамагчы ў «бітве з часам».
Дзейны прэзідэнт ЗША Джо Байдэн павінен выйсці з гонкі за пасаду кіраўніка дзяржавы, каб выратаваць дэмакратыю. З такім заклікам выступіў амерыканскі акцёр Джордж Клуні ў калонцы для The New York Times. Артыкул выйшаў пад загалоўкам: «Я люблю Джо Байдэна. Але нам патрэбны новы кандыдат».
Клуні назваў сябе «пажыццёвым дэмакратам», адзначыўшы, што некалькі разоў удзельнічаў у зборы сродкаў для прэзідэнцкіх кампаній кандыдатаў ад Дэмакратычнай партыі. Ён згадаў збор ахвяраванняў на прасоўванне Барака Абамы (2012), Хілары Клінтан (2016) і Байдэна ў 2020 годзе.
«Аднак Джо Байдэн, з якім я быў тры тыдні таму на дабрачынным мерапрыемстве, – гэта не той Джо Байдэн <...> 2010 года. Ён нават не быў Джо Байдэнам 2020 года. Ён быў тым чалавекам, якога мы ўсе бачылі на дэбатах», – напісаў акцёр.
Ён дапусціў, што прэзідэнт ЗША мог стаміцца або застудзіцца перад дэбатамі са сваім канкурэнтам – экс-кіраўніком дзяржавы Дональдам Трампам.
«Але нашым партыйным лідарам трэба перастаць гаварыць нам, што 51 мільён чалавек не ўбачыў таго, што мы толькі што ўбачылі», – мяркуе акцёр.
На думку Клуні, сітуацыя вакол Байдэна абумоўлена ўзростам, і «нічым больш».
«Я люблю Джо Байдэна. Як сенатара. Як віцэ-прэзідэнта і як прэзідэнта. <...> Але адзіная бітва, у якой ён не можа перамагчы, – гэта бітва з часам», – напісаў акцёр.
На заканчэнне Клуні выказаў меркаванне, што Дэмакратычная партыя «не пераможа ў лістападзе з гэтым прэзідэнтам» як на выбарах кіраўніка дзяржавы, так і на выбарах у абедзве палаты кангрэсу. Ён назваў Байдэна героем, які «выратаваў дэмакратыю» ў 2020 годзе, і заклікаў ізноў зрабіць гэта праз чатыры гады.