Паліну Шарэнду-Панасюк зноў этапавалі
3- 5.07.2024, 10:12
- 2,146
Маці дваіх дзяцей прымусова накіравалі на псіхіятрычную экспертызу.
Актывістку грамадзянскай кампаніі «Еўрапейская Беларусь» Паліну Шарэнду-Панасюк вывезлі з гомельскага СІЗА ў Рэспубліканскі цэнтр псіхічнага здароўя ў Навінках. Падрабязнасці паведаміў муж палітвязні Андрэй Шарэнда ў Facebook:
- Паліны больш няма ў СІЗА-3 у Гомелі. Яе чарговым разам вязуць у Рэспубліканскі цэнтр псіхічнага здароўя «Навінкі» для праходжання псіхолага-псіхіятрычнай экспертызы. І гэта ўжо трэці раз, калі яе накіроўваюць туды. Чарговы страшны этап для Паліны, які можа зацягнуцца на 2-3 тыдні. А далей той жа пякельны этап у зваротным кірунку.
Два разы Паліну адпраўлялі на экспетызу ў РНПЦ псіхічнага здароўя. Гэта было перад яе першым судом у 2021 годзе, а потым пасля спробы Паліны адмовіцца ад беларускага грамадзянства. Яшчэ адна такая экспертыза праводзілася проста ў следчым ізалятары. Цяпер актывістку пастанавілі ў чацвёрты раз адправіць на экспертызу.
Нагадаем, палітзняволеная мусіла выйсці на волю 21 траўня, але за два дні да гэтага яе этапавалі ў СІЗА ў межах новай крымінальнай справы паводле арт.411 КК (злоснае непадпарадкаванне адміністрацыі калоніі).