NATO перакіне ў Польшчу дадатковыя сістэмы СПА
- 5.07.2024, 18:11
- 3,208
![NATO перакіне ў Польшчу дадатковыя сістэмы СПА](https://i.c97.org/ai/601700/aux-head-1720192246-20240705_aegis_ashore_360.png)
Сістэмы даставяць на новую базу Aegis Ashore.
Лідары 32 краінаў NATO прымуць на саміце NATO ў Вашынгтоне, які пройдзе 9–11 ліпеня, пастанову пра ўзмацненне сістэмаў супрацьпаветранай і супрацьракетнай абароны альянсу, у тым ліку на найноўшай базе Aegis Ashore у Польшчы, заявіў генеральны сакратар ваеннага блоку Енс Столтэнберг. «Мы таксама яшчэ больш умацуем нашу сістэму супрацьракетнай абароны з дапамогай новай базы Aegis Ashore у Польшчы», – адзначыў ён на прэс-канферэнцыі напярэдадні мерапрыемства.
Паводле словаў генеральнага сакратара, чальцы альянсу маюць намер таксама ўхваліць пагадненне, якое ўмацуе трансатлантычнае абаронна-прамысловае супрацоўніцтва і павялічыць вытворчасць узбраенняў.
Енс Столтэнберг нагадаў, што з моманту пачатку агрэсіі Расеі супраць Украіны ў 2014 годзе «NATO кардынальна трансфармавалася». «Сёння ў нас 500 000 вайскоўцаў у стане падвышанай гатоўнасці; упершыню ва ўсходняй частцы альянсу знаходзяцца баяздольныя баявыя групы; больш перадавых магчымасцяў, у тым ліку самалёты пятага пакалення; два новыя, вельмі адданыя справе чальцы – Фінляндыя і Швэцыя», – растлумачыў ён, падкрэсліўшы: умацаванне абароны NATO стала магчымым у тым ліку дзякуючы таму, што чальцы альянсу сталі выдаткоўваць больш на абарончыя патрэбы.
Aegis Ashore – гэта сістэма супрацьракетнай абароны, распрацаваная ЗША для абароны ад балістычных ракетаў. Aegis Ashore уключае ў сябе радары, ракетныя пускавыя ўстаноўкі і іншыя кампаненты. Польская база Aegis Ashore, уведзеная ў строй у канцы 2023 года, размешчаная ў вёсцы Рэдзікава, недалёка ад Балтыйскага ўзбярэжжа. Яна з'яўляецца часткай больш шырокай сістэмы супрацьракетнай абароны NATO і прызначаная для абароны Еўропы ад балістычных ракетаў сярэдняй і меншай далёкасці. База абсталяваная ракетамі-перахопнікамі SM-3 і радарам AN/SPY-1, якія могуць выяўляць і знішчаць варожыя ракеты ў палёце. Стварэнне базы ў Польшчы з'яўляецца важным элементам еўрапейскага кампанента глабальнай сістэмы супрацьракетнай абароны ЗША і NATO, закліканага павысіць бяспеку і стабільнасць у рэгіёне.