Мазырскі памежны атрад заклікае жыхароў рэгіёну сачыць за дронамі
16- 5.07.2024, 19:20
- 6,154
![Мазырскі памежны атрад заклікае жыхароў рэгіёну сачыць за дронамі](https://i.c97.org/p/articles/ai-224375-aux-head-20160926_dron_t.jpg)
Асцерагаюцца ўдару па Мазырскім НПЗ.
Мазырскі памежны атрад заклікае жыхароў рэгіёну быць пільнымі. Пра гэта чамусьці паведаміла прэс-служба Мазырскага НПЗ, нягледзячы на тое, што памежны атрад мае свой раздзел на сайце Дзяржаўнага памежнага камітэта.
Памежнікі просяць у выпадку выяўлення ў памежнай зоне і на прылеглай да яе тэрыторыі невядомых асобаў, замежнікаў, а таксама тых, хто цікавіцца дыслакацыяй памежнікаў, аховай мяжы або яе праходжаннем, паведамляць пра гэта.
У Мазырскім памежным атрадзе таксама раяць паведамляць пра аўтамабілі з нумарамі іншых краінаў, машыны таксі, а таксама пра якія-небудзь лётныя апараты паблізу мяжы.
Нагадаем, раней у Дзяржаўным памежным камітэце Беларусі расказалі, што маюць звесткі пра знаходжанне ў паласе адказнасці Жытомірскага памежнага атрада падраздзяленняў РДК, які нібыта вядзе там выведку, у тым ліку «з выхадам на дзяржаўную мяжу Рэспублікі Беларусь».
На гэтым кірунку беларускія памежнікі «зафіксавалі рэкагнасцыроўку мясцовасці і актыўную выведную дзейнасць», збілі дрон і знайшлі хованку з выбухоўкай.