Беларус паказаў, на якой мове гаварылі ў Бранскай вобласці 30 гадоў таму
1- 18.11.2026, 16:50
Відэа знята ў адным з райцэнтраў.
Беларус паказаў у сацсетцы Threads, на якой мове гаварылі жыхары вёсак і невялікіх гарадоў Бранскай вобласці РФ у самым канцы мінулага стагоддзя. Відэа знята ў адным з райцэнтраў.
«Думаеце, гэта нейкая вёска ў глыбінцы Беларусі? Зусім не! Гэта Чырвоная Гара — раённы цэнтр у Бранскай вобласці Расіі. Пачатак 1990-х гадоў. Людзі гавораць на жывой беларускай мове», — напісаў ён.
Гісторыя сучаснай Бранскай вобласці цесна звязаная з гісторыяй беларускіх земляў. У старажытнасці тут жылі радзімічы — усходнеславянскае плямя, якое рассялілася ў басейнах рэк Сож, Іпуць і Бесядзь. Менавіта радзімічы сталі адным з важных складнікаў фармавання беларускага народа.
У Сярэднявеччы гэтыя землі ўваходзілі ў склад Чарнігаўскага і Бранскага княстваў, а ў XIV стагоддзі значная частка рэгіёну апынулася пад уладай Вялікага Княства Літоўскага.
На картах расійскіх этнографаў XIX і пачатку XX стагоддзяў большая частка сучаснай Бранскай вобласці паказаная як тэрыторыя, насельніцтва якой размаўляе на беларускай мове.