Славенія спыніла выдачу віз расіянам
- 19.11.2026, 3:00
Гаворка пра турыстычныя візы.
З 16 лістапада візавыя цэнтры Славеніі ў Расіі не прымаюць заявы на турыстычныя візы. Пра гэта паведаміў візавы аператар VFS Global на сваім сайце.
Расіяне па-ранейшаму могуць падаць дакументы на шэнгенскую візу для паездкі да сваякоў, грамадзян ЕС, а таксама для дзелавых візітаў і ўдзелу ў канферэнцыях. Але спачатку такую паездку трэба ўзгадніць з пасольствам Славеніі.
Заявы могуць падаваць і работнікі міжнароднага транспарту: маракі, кіроўцы-дальнабойшчыкі і пілоты. Застаецца і нацыянальная віза D для ўз'яднання сям'і з грамадзянамі ЕС. Асацыяцыя тураператараў Расіі (АТОР) патлумачыла, што ўжо выдадзеныя візы застаюцца дзейнымі.
Што папярэднічала рашэнню
Як піша The Moscow Times, раней МУС Славеніі паведаміла, што міністры ўнутраных спраў краін Еўрасаюза падтрымалі абмеркаванне новых абмежаванняў на выдачу шэнгенскіх віз расіянам. У сярэдзіне кастрычніка лідары ЕС прапанавалі разгледзець больш жорсткія візавыя патрабаванні, каб «супрацьдзейнічаць гібрыдным пагрозам».
Пасля пачатку поўнамаштабнага ўварвання ва Украіну Еўрасаюз прыпыніў спрашчаны візавы рэжым з Расіяй. Больш за дзесяць краін Шэнгену перасталі выдаваць турыстычныя візы. У гэтым годзе Еўракамісія забараніла афармляць расіянам новыя шматразовыя шэнгенскія візы, таму на кожную паездку дакументы трэба падаваць нанова.
У 2025 годзе расіяне атрымалі каля 478 тыс. турыстычных шэнгенскіх віз, многія з іх былі шматразовымі. Амаль тры чвэрці ўсіх заяў прыйшліся на Францыю, Італію і Іспанію.
Пазіцыі краін ЕС
Фінляндыя, Латвія, Літва і Эстонія заклікалі ўвогуле не выдаваць расіянам візы, пакуль Масква працягвае вайну. Большасць астатніх краін не падтрымалі адмену турыстычных віз. Паводле Bloomberg, у межах новага пакета санкцый ЕС абмяркоўвае забарону на ўезд у блок для былых удзельнікаў вайны супраць Украіны.