19 лiстапада 2026, Чацвер, 18:50
Падтрымайце
сайт
Сім сім,
Хартыя 97!
Рубрыкі

Кітай увёў абмежаванні на пастаўкі ў Расію рухавікоў для дронаў «Шахед»

1
Кітай увёў абмежаванні на пастаўкі ў Расію рухавікоў для дронаў «Шахед»

У дзень, калі кіраўнік Крамля прыбыў у КНР.

Кітай уводзіць новыя абмежаванні на пастаўкі ў Расію кампанентаў для беспілотнікаў, у тым ліку тых, што выкарыстоўваюцца пры вытворчасці і кіраванні ўдарнымі дронамі «Шахед». Пад экспартны кантроль трапілі рухавікі, радыёмодулі і іншыя камплектуючыя для БПЛА, піша The Moscow Times.

Абмежаванні прадугледжаныя паведамленнем Міністэрства камерцыі КНР №49, якое ўступіла ў сілу 18 лістапада. У той жа дзень Уладзімір Пуцін прыбыў у Шэньчжэнь для сустрэчы з Сі Цзіньпінам і Дональдам Трампам.

Якія кампаненты трапілі пад абмежаванні

Згодна з дакументам, экспартны кантроль распаўсюджваецца на рэактыўныя рухавікі з цягаю больш за 400 Н і іншыя рухавікі для беспілотнікаў магутнасцю звыш 16 кВт. Такія камплектуючыя прымяняюцца ў «Шахедах», вытворчасць якіх Расія наладзіла на заводзе ў Алабузе (Татарстан).

Абмежаванні таксама закранулі радыёмодулі магутнасцю ад 30 dBm, здольныя забяспечваць кіраванне больш чым дзесяццю беспілотнікамі. Акрамя таго, пад кантроль трапілі рэгулятары хуткасці і бескалектарныя электрарухавікі.

Цяпер для вывазу гэтых тавараў за межы Кітая спатрэбіцца спецыяльны дазвол Міністэрства камерцыі КНР.

Украіна падзякавала Пекіну за новыя абмежаванні

Упаўнаважаны прэзідэнта Украіны па пытаннях санкцыйнай палітыкі Уладзіслаў Уласюк вітаў рашэнне кітайскіх уладаў.

«Дзякуем Кітаю за новыя меры экспартнага кантролю па дронах», — заявіў ён.

Паводле слоў Уласюка, украінскі бок перадаў Пекіну інфармацыю пра кітайскія кампаненты, якія выкарыстоўваюцца ў расійскіх узбраеннях, а таксама пра вытворцаў гэтай прадукцыі. У Кіеве разлічваюць, што новыя абмежаванні будуць строга выконвацца.

Расія залежыць ад кітайскіх тэхналогій

Па даных крыніц Bloomberg, знаёмых з непублічнай статыстыкай, амаль 90% крытычных кампанентаў і тэхналогій, пастаўкі якіх былі абмежаваныя заходнімі санкцыямі, Расія атрымлівае з Кітая. Годам раней гэты паказчык складаў каля 80%.

Нягледзячы на заяўленыя Крамлём праграмы імпартазамяшчэння, залежнасць расійскай прамысловасці ад кітайскіх паставак працягвае расці.

У Еўрасаюзе ведаюць пра ролю Пекіна ў забеспячэнні Расіі тэхналогіямі двайнога прызначэння і нават спадарожнікавай разведкай для вядзення вайны. Аднак, як паведамлялі крыніцы агенцтва, еўрапейскія краіны баяцца ўводзіць санкцыі супраць Кітая з-за магчымых контрмер.

Частка камплектуючых засталася па-за экспартным кантролем

Разам з тым, паводле слоў Уласюка, новыя абмежаванні не ахопліваюць некаторыя важныя кампаненты, якія працягваюць пастаўляцца ў Расію.

У прыватнасці, гаворка ідзе пра антэны CRPA, якія абараняюць беспілотнікі ад перашкод, навігацыйныя модулі, антэны HARXON, камеры з падвесамі і сервапрывады. Гэтыя камплектуючыя выкарыстоўваюцца ў тым ліку ў расійскіх дронах «Герань-2».

Напісаць каментар 1

Таксама сачыце за акаўнтамі Charter97.org у сацыяльных сетках

▲