Беларускую інтэрнэт-бібліятэку Kamunikat.org удалося аднавіць

Пасля хакерскай атакі спецыялісты ўмацоўваюць абарону сайта.

Аднаўлена частка матэрыялаў сайта інтэрнэт-бібліятэкі Kamunikat.org, якая 7 мая стала аб’ектам атакі хакераў. Аб гэтым 8 мая паведаміў «Радыё Свабода» заснавальнік інтэрнэт-бібліятэкі і дырэктар аднайменнага выдавецтва Яраслаў Іванюк.

Паводле слоў Іванюка, сайт для наведвальнікаў пачне працаваць не адразу.

«Спачатку трэба правесці ўсе неабходныя захады, каб упэўніцца, што няма шкоднаснага віруса», — патлумачыў Яраслаў Іванюк.

Дзень поўнага аднаўлення працы сайта ён не назваў, як і не ўзяўся ацэньваць у працэнтах долю матэрыялаў інтэрнэт-бібліятэкі, якія ўжо ўдалося аднавіць.

«Сайт фактычна цалкам адноўлены. Цяпер займаемся ўдасканаленнем структуры, каб пазбегнуць такога кшталту атак у будучыні. Работа ідзе, але калі яна будзе завершаная, сказаць пакуль складана», — прызнаў Іванюк.

Яраслаў Іванюк сказаў, што праінфармаваў пра здарэнне з інтэрнэт-бібліятэкай установу польскай сістэмы кібербяспекі CERT Polska — каманду рэагавання на надзвычайныя сітуацыі ў інтэрнэце, якая дзейнічае ў складзе дзяржаўнага даследчага інстытута NASK («Навуковая і акадэмічная камп’ютарная сетка»).

CERT Polska адказвае за рэагаванне на інцыдэнты бяспекі ў інтэрнэце, але не мае следчых паўнамоцтваў. Там Іванюка выслухалі і прапанавалі запоўніць адпаведныя дакументы пра здарэнне.

«Я таксама распавёў гісторыю ціску і атак на Kamunikat. Далей яны будуць дзейнічаць згодна са сваімі задачамі, а мы працягваем выконваць свае. Але ўжо цяпер на 100% упэўнены, што гэтая атака невыпадковая і што пад падобнай пагрозай апынуліся не толькі мы, але і сайты іншых культурных беларускіх праектаў».

Іванюк заклікаў калег па беларускіх культурных праектах быць пільнымі.

«У нас усё пачалося ў кастрычніку мінулага года, калі рэзка павялічылася колькасць запытаў з IP-адрасоў, зарэгістраваных у Кітаі. У лістападзе іх было ўжо ў тысячу разоў больш. Ад атакі ў канцы снежня ўдалося адбіцца, але цяперашняя атака была яшчэ больш масавая: на нас напалі адначасова з адрасоў у Тайвані, Сінгапуры, Інданезіі, іншых паўднёваазіяцкіх краін. Таму раіў бы калегам быць пільнымі, адсочваць падазроныя запыты і своечасова блакаваць IP-адрасы, з якіх яны паходзяць», — пералічыў Яраслаў Іванюк свае парады ў размове з «Радыё Свабода».

Паводле слоў Яраслава Іванюка, праца па аднаўленні інтэрнэт-бібліятэкі працягваецца.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com