Лукашэнка кажа, што знайшоў рэтранслятары, але не ведае, хто іх усталёўваў

Як дыктатар дапамагае РФ біць па Украіне.

Пасля адключэння рэтранслятараў у Беларусі Расія не зможа атакаваць Кіеў і захад Украіны «Шахедамі» ў рэжыме анлайн-кіравання. Пра гэта ў інтэрв’ю «Суспільному» заявіў дарадца міністра абароны Украіны Сяргей Флэш Бескрэстнаў.

Бескрэстнаў распавёў, што рэтранслятары ўсталёўваюць на вышкі вышынёй каля 45–70 метраў. Для гэтых мэтаў могуць выкарыстоўвацца вышкі мабільнага аператара, тэлевежы або наогул любыя вышкі. На іх усталёўваюць падключаны да інтэрнэту прыёмаперадатчык і антэну, накіраваную ў бок Украіны.

— Кожная такая кропка дазваляе кіраваць «Шахедам» на дыстанцыі да 200 км. Але ёсць такія месцы, да якіх вышкі з Расіі не дасягаюць. Напрыклад, Львоў, Ковель, іншыя рэгіёны Захаду Украіны. Каб кіраваць ударнымі і разведвальнымі БПЛА, запушчанымі па гэтых тэрыторыях, расіяне выкарыстоўвалі чатыры вышкі з устаноўленымі на іх рэтранслятарамі сігналу на тэрыторыі Беларусі, — кажа Бескрэстнаў.

Па яго словах, адна з такіх вышак стаяла ля самай мяжы недалёка ад горада Слаўуціч.

— Зараз Беларусь кажа, што яны знайшлі такія рэтранслятары, але не ведаюць, хто іх усталёўваў. То-бок спрабуюць гуляць у гульню, што нейкія людзі ўсталявалі прылады, падключылі іх да інтэрнэту і зніклі, — заявіў Бескрэстнаў.

— Як мы выявілі гэтыя рэтранслятары?

— Гэта адносна проста. Калі мы бачым, што «Шахед» або «Гербера» (расійскія тыпы дронаў. — Заўв. рэд.) працуе ў эфіры з mesh-мадэмам, мы можам уключыць устаноўленыя на вышыні пеленгатары або падняць іх у паветра на БПЛА і так убачыць, што радыёсігналы кіравання выпраменьваюцца з тэрыторыі Беларусі. Таксама мы можам выканаць трыангуляцыю, гэта значыць узяць некалькі пеленгаў і даволі дакладна вызначыць зону, дзе размешчаная вышка з рэтранслятарам. Візуальна вышку можна зафіксаваць з самалёта. Трэба разумець, што пабудаваная mesh-сетка можа не выкарыстоўвацца тут і цяпер, але ў любы момант яе могуць уключыць. То-бок гэта гатовая інфраструктура, якая стварае нам пагрозу. Гэта як аэрадром для «Шахедаў», на якім іх цяпер няма, але мы разумеем, што для нас гэта такая бомба схаванага дзеяння.

Такія вышкі, распавядае Флэш, стараюцца ўсталёўваць ля самай мяжы, і Украіне ўжо даводзілася іх знішчаць. Цяжэй, калі расійскія БПЛА выкарыстоўваюць беларускія мабільныя сеткі.

— На кожным «Шахедзе» ўсталяваны LTE-мадэм з SIM-картай расійскай кампаніі Т2 (да 2024 года называлася «Tele2 Расія»). І калі расійскія «Шахеды» і «Герберы» лётаюць побач з мяжой Беларусі, яны могуць «чапляцца» за беларускія сеткі мабільнай сувязі і выкарыстоўваць іх для перадачы інфармацыі з тэрыторыі Украіны. То-бок гэта выкарыстанне камерцыйных сетак мабільнай сувязі ў ваенных мэтах. І Беларусь пра гэта ведае. Беларускія аператары могуць гэта спыніць, абмежаваць роўмінг для гэтых картак, блакаваць іх, але яны гэтага не робяць. І мы таксама хочам, каб гэта не выкарыстоўвалася.

Бескрэстнаў кажа, што ў маі, калі РФ масіравана атакавала заходнія вобласці Украіны, яе БПЛА ляцелі побач з мяжой Беларусі і выкарыстоўвалі роўмінг беларускіх мабільных аператараў.

— Лічу, што гэта таксама садзейнічанне з боку Беларусі расійскім атакам на Украіну. Можна сказаць, што яны тут ні пры чым, што яны не ведаюць, што адбываецца. Але нашы сродкі радыяманіторынгу пацвярджаюць, што мадэм «Шахеда» працуе з сеткай Беларусі, — адзначыў ён.

Дарадца міністра абароны Украіны дадае, што пасля адключэння рэтранслятараў на тэрыторыі Беларусі расійскія беспілотнікі не перастануць атакаваць Кіеў і захад Украіны. Але гэтыя атакі не будуць такімі выніковымі.

— Гэта будуць стандартныя атакі па GPS-каардынатах. Разведкі не будзе. Гэта вельмі важна, таму што расіяне не толькі атакуюць нас анлайн дзякуючы гэтым сеткам — яны вядуць магутную разведку, выяўляючы нашыя аб’екты інфраструктуры, нашу ППА і гэтак далей. Не будзе анлайн-атак на лакаматывы цягнікоў, таксама на ППА. Бо для гэтага патрэбныя mesh-сетка і радыёканал кіравання. Таксама расіяне не змогуць шукаць калідоры, дзе няма нашых перахопнікаў.

— Што б вы сказалі, каб падсумаваць размову?

— Мы не хочам, каб Беларусь дапамагала расіянам забіваць нас.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com