Сям'я мінчукоў зарабіла на чарніцы 700 рублёў за пяць дзён

Аказалася, ягады вельмі запатрабаваныя.

Мінчукі Вікторыя і Арцём сабралі ў лесе чарніцу для сябе — і наўдачу апублікавалі ў Threads аб’яву пра продаж ягад. Аказалася, чарніца вельмі запатрабаваная. Пра нечаканы прыбытак, сустрэчу з лосем і кляшчамі мінчукі расказалі MYFIN.

«А што скажуць людзі?» Баяліся прапаноўваць ягады на продаж

Вікторыі 27 гадоў, і яна індывідуальная прадпрымальніца. Арцёму 31 год, ён працуе электрыкам па найме. Пара адзначае, што падзарабіць на чарніцы атрымалася зусім выпадкова.

«Мы прыехалі ў вёску на выхадныя і пайшлі ў лес назбіраць ягад для сябе. Потым без асаблівых чаканняў вырашылі апублікаваць аб’яву пра продаж чарніцы ў сацсетцы. Адразу ж прыйшоў адзін заказ, а потым і другі. Наш эксперымент хутка выйшаў з-пад кантролю».

Абвясціць у інтэрнэце пра продаж было трошкі страшнавата: думка «што ж скажуць людзі» не выходзіла з галавы.

Іх здзівіў попыт на чарніцу. Заказчыкі хацелі купляць ягады не па два-тры літры, а адразу па пяць. Некаторыя і ўвогуле пісалі з просьбай прадаць дзесяць літраў чарніцы. Шмат каму пара адмовіла, бо ягады збіраюць уручную і з такімі аб’ёмамі не справіліся б. Чыстую чарніцу без галінак і лісця прадавалі па 20 рублёў за літр. Пяцілітровае вядро сыходзіла за 100 рублёў з дастаўкай да пад’езда.

«Зараз бачу аб’явы і з ніжэйшай цаной, але гэта нялёгкая праца, таму прадаваць танней мы не хацелі. Паколькі збіралі не спецыяльнымі камбайнамі, а ўручную, то хуткасць была далёкая ад касмічнай. З сёмай раніцы да першай гадзіны дня ўдавалася набраць усяго пяць–шэсць літраў».

Абсалютна ўсе пакупнікі прыйшлі з Threads. Шмат каго не задавальняў кошт: адны адзначалі, што на рынку чарніцу прадаюць у два разы танней, а іншыя казалі, што не могуць сабе дазволіць купіць адразу пяць літраў за такую цану, але адзін-два возьмуць з задавальненнем.

«Найцяжэйшае — рана прачнуцца!»

Хадзіць у лес герояў навучылі бабулі і дзядулі, да якіх яны, будучы дзецьмі, летам часта прыязджалі ў госці. З тых часоў Вікторыя і ведае ягадныя месцы. Кожныя выходныя пара ездзіць да дзядулі ў вёску ў Барысаўскім раёне, дзе ёсць правераныя палянкі.

«Я з дзяцінства прывыкла: калі плануецца паход у лес, то ўстаць трэба а чацвёртай раніцы, а ў пяць ужо выйсці з дому, каб паспець назбіраць ягады да піку спёкі. Акрамя таго, у бабулі былі гаспадарка і агарод. Вядома, трэба было паспець дапамагчы і з гэтым».

Каб збіраць з нізкарослай расліны, патрэбныя вытрымка, добрая фізічная форма і нават адвага. Вікторыя адзначае, што цяжэй за ўсё даводзілася спіне, нягледзячы на выкарыстанне невялікага стульчыка. У лесе пару падсцерагалі і іншыя складанасці. Напрыклад, рэпеленты і закрытае адзенне не заўсёды ратавалі ад кляшчоў і камароў. Да укусаў справа не дайшла, але здымаць з сябе крывасмокаў усё ж давялося.

Нагадаў пра сябе і гаспадар барысаўскіх палянак — лось, што з’явіўся ўсяго ў пяцідзесяці метрах ад зборшчыкаў ягад. Нечаканая сустрэча прайшла мірна, хоць раней сохатых так блізка яны не бачылі. Да таго ж Вікторыя панічна баіцца змеяў і вельмі рада, што хаця б яны не адважыліся пазнаёміцца бліжэй.

«Гэта не лёгкія грошы»

За пяць дзён пара зарабіла 700 рублёў. Пры гэтым два дні гераіня хадзіла ў лес адна. Нягледзячы на ягадны поспех, пара вырашыла гэтым летам больш не збіраць чарніцу на продаж — зашмат клопатаў у горадзе. На сваёй старонцы ў Threads дзяўчына стварыла нітку, дзе іншыя збіральнікі пакінулі свае кантакты для патэнцыйных пакупнікоў.

«Выязджаючы з лесу, я сказала яму дзякуй за такія шчодрыя дары. Зарабленая сума — нядрэнная падмога для побыту. Калі б мы сур’ёзна заняліся зборам ягад і ўзялі адпачынкі на сезон чарніцы, то зарабілі б значна больш».

Паводле слоў мінчукоў, сёлета ў лесе багаты ўраджай чарніцы. Галоўнае — ведаць добрыя месцы і не ленавацца. Вікторыя адзначае: ягад хопіць усім.

Ці паўтораць мінчукі свой эксперымент у наступным сезоне? Вікторыя не можа даць адназначнага адказу і лічыць, што ўсё будзе залежаць ад ураджаю і жадання, бо гэты спосаб заробку лёгкім дакладна не назавеш.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com