«Заявы Лукашэнкі і чыноўнікаў пра Кітай — анекдот»

Супрацоўніцтва з Кітаем у цяперашнім выглядзе — дэградацыя.

У праграме на БРЦ аналітык Сяргей Чалы пракаментаваў нядаўні візіт кіраўніка Беларусі ў Кітай.

Першы віцэ-прэм’ер Мікалай Снопкаў, распавядаючы пра сустрэчу Аляксандра Лукашэнкі і Сі Цзіньпіна, заявіў пра «тэхналагічную самадастатковасць Беларусі» і пры гэтым пра неабходнасць прамысловага супрацоўніцтва дзвюх краін па 11 тэхналогіях:

— Мы хочам сумесна вырабляць (прамысловую прадукцыю — заўв.) на аснове гэтых тэхналогій з кітайскімі партнёрамі. Гэта для нас вельмі важна, і паглыбленне, нарошчванне, развіццё, безумоўна, дасць магутны імпульс эканамічнаму росту краіны.

Чалы адзначыў:

— У яго (Снопкава — заўв.) мова паварочваецца казаць, што гэта тэхналагічная самадастатковасць Беларусі… Усяго 11 тэхналогій выратуе «гіганта думкі»… Не, гэта не дасць ніякага імпульсу эканамічнаму росту краіны. Гэта азначае асуджаць сябе на дэградацыю, нават пры тым, што вы будзеце валодаць гэтымі (кітайскімі — заўв.) тэхналогіямі. Але канкураваць вы будзеце з першымі ўладальнікамі тэхналогій.

Чалы таксама звярнуў увагу на словы Снопкава пра тое, што Беларусь — гэта «жамчужына на кітайскім Шаўковым шляху». Эканаміст назваў гэтае сцверджанне «анекдотам».

— Строга кажучы, сапраўднай эканамічнай кааперацыі і тэхналагічнага супрацоўніцтва няма. Было ўжо некалькі дырэктыў Лукашэнкі аб супрацоўніцтве з Кітаем. І ўсе яны былі пра тое, што пара ўжо пераводзіць супрацоўніцтва з гандлёвага ў інвестыцыйнае. Але гэта ні да чаго не прыводзіла. Акрамя таго, што мы закупаем тэхналогіі — як любы можа набыць.

Інтарэс Кітая быў у транзіце і ў індустрыяльным парку. Але як толькі пачалі перакрывацца чыгуначныя шляхі (у бок Польшчы — заўв.), быў раскансерваваны праект альтэрнатыўнага шляху (Транскаспійскага міжнароднага транспартнага маршруту, які злучае КНР з Еўропай праз Казахстан, Каспійскае мора, Азербайджан, Грузію і Турцыю — заўв.). Гэты шлях складаны, доўгі, але Кітай дыверсіфікуе свае рызыкі, — сказаў Чалы.

Ён нагадаў пра папярэднюю выснову, што «ўся эканоміка Беларусі пачынае ператварацца ў зборчы цэх з кітайскіх камплектуючых паводле кітайскіх тэхналогій»:

— І мы пра гэта казалі як пра непрыглядную будучыню для Беларусі. Бо канкураваць табе давядзецца коштам працоўнай сілы. І гэта асабліва цяжка рабіць ва ўмовах, калі мы ўсе разумеем: прамысловая вытворчасць у Кітаі цяпер — глыбока субсідзіраваны напрамак. І гэта яго галоўная канкурэнтная перавага, — адзначыў Чалы.

Эканаміст звярнуў увагу на публікацыю пра тое, як у Баранавічах працуе вытворчасць кітайскіх халадзільнікаў «Midea».

— Займацца тым жа, што робіць Кітай, з тых жа камплектуючых і па тых жа тэхналогіях, але рабіць гэта дзесьці (не ў КНР — заўв.) — азначае асуджаць сябе на тое, што заробкі будуць вельмі нізкія. Бо ты будзеш наўпрост канкураваць з Кітаем і вырабленым у Кітаі, — адзначыў эканаміст.

Чалы здзіўлены, што ўлады «не лічаць гэта праблемай». У КНР Лукашэнка заявіў, што Беларусь «па ўсіх напрамках» эканамічнага развіцця выкарыстоўвае кітайскія тэхналогіі.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com