Вялікабрытанія і ЕС увялі сумесныя кіберсанкцыі супраць Расіі

Пад іх таксама трапілі высокапастаўленыя службоўцы ГРУ.

Вялікабрытанія і Еўрапейскі саюз увялі першы сумесны пакет санкцый у адказ на расійскія кібератакі і гібрыдныя аперацыі. У санкцыйны спіс увайшлі 24 фізічныя і юрыдычныя асобы, звязаныя з расійскімі спецслужбамі, кіберкрымінальнымі сеткамі і кампаніямі па дэзінфармацыі. Пра гэта паведаміў урад Вялікабрытаніі.

Санкцыі накіраваныя супраць асоб і структур, датычных да кібератак, умяшання ў выбары і распаўсюду антыўкраінскай прапаганды ў Еўропе.

Пад абмежаванні трапілі высокапастаўленыя супрацоўнікі Галоўнага разведвальнага ўпраўлення РФ Вячаслаў Стафееў, Іван Сенін і Іван Касьяненка, якіх Лондан лічыць датычнымі да кіраўніцтва кібер- і гібрыднымі аперацыямі.

Паводле даных брытанскага ўрада, кіберпадраздзяленне вайсковай часткі ГРУ № 29155 супрацоўнічала з кампаніяй IMPULS для вярбоўкі хакераў і спецыялістаў па кібербяспецы сярод студэнтаў расійскіх універсітэтаў і акадэмій.

Вялікабрытанія і краіны ЕС афіцыйна ўсклалі на Цэнтр 16 Федэральнай службы бяспекі Расіі адказнасць за кібератаку на энергетычную сістэму Польшчы, якая адбылася ў снежні 2025 года. У Лондане заявілі, што атаку ўдалося прадухіліць, аднак яна магла пакінуць без электразабеспячэння каля 500 000 чалавек у разгар зімы.

Санкцыі таксама ўведзены супраць асоб, датычных да выкарыстання шкоднаснага праграмнага забеспячэння Lumma Stealer, прызначанага для масавага выкрадання канфідэнцыйных дадзеных з інфікаваных прылад. Брытанскія ўлады сцвярджаюць, што Расія выкарыстоўвала скрадзеныя ўліковыя дадзеныя для кібершпіянажу ў інтарэсах Крамля. Паводле ацэнкі Нацыянальнага агенцтва па барацьбе са злачыннасцю Вялікабрытаніі (NCA), толькі за апошнія шэсць месяцаў ахвярамі Lumma Stealer у краіне сталі не менш як 2100 чалавек.

Пад новыя абмежаванні таксама трапілі 10 прадстаўнікоў расійскай кампаніі Rybar LLC. Паводле даных Лондана, яна распаўсюджвала ілжывыя наратывы пра Украіну і ўмешвалася ў выбары ў еўрапейскіх краінах, у прыватнасці ў Малдове і Арменіі.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com