СМІ: На БелАЭС адбылася аварыйная сітуацыя

Энергаблок нечакана адключылі.

У канцы ліпеня другі энергаблок БелАЭС нечакана адключылі ад сеткі на дзевяць дзён. Афіцыйна гэта патлумачылі правядзеннем дыягнастычных мерапрыемстваў электратэхнічнага абсталявання. Аднак крыніца «Zerkalo» сцвярджае, што на станцыі адбылася аварыйная сітуацыя — працяканне вады ў корпусе турбагенератара. Эксперты лічаць гэтую версію праўдападобнай і нагадваюць, што аналагічнае абсталяванне таго ж расійскага вытворцы ўжо станавілася прычынай сур'ёзнага інцыдэнту на АЭС у Расіі.

26 ліпеня прэс-служба БелАЭС паведаміла пра адключэнне другога энергаблока ад сеткі. Праз дзевяць дзён кіраўніцтва станцыі адрапартавала, што пасля правядзення дыягнастычных мерапрыемстваў энергаблок зноў уключаны ў працу і выведзены на намінальныя параметры.

Аднак крыніца выдання на БелАЭС, якая пажадала захаваць ананімнасць, сцвярджае, што спыненне не было планавым — прычынай сталі непаладкі.

— Сапраўднай прычынай стала падвышаная вільготнасць у корпусе турбагенератара ТГ-2. Гэта адбылося з-за разгерметызацыі сістэмы падачы вады і яе працякання ў корпус аднаго з асноўных элементаў функцыянавання АЭС. Вытворцам турбагенератара з'яўляецца расійская кампанія «Силовые машины», яна ж вырабляе і абслугоўвае гэта абсталяванне, — паведаміла крыніца.

Яшчэ ў 2017 годзе, падчас будаўніцтва першага энергаблока БелАЭС, расійскі фізік-ядзершчык Андрэй Ажараўскі папярэджваў пра пастаўку на беларускую атамную станцыю дэфектнага турбагенератара ад расійскай кампаніі «Силовые машины». Аналагічны ў 2016 годзе прывёў да аварыі на Нававаранежскай АЭС і непланавога спынення энергаблока.

Прычынай назвалі кароткае замыканне. У выніку было прынята рашэнне не рамантаваць, а цалкам замяніць статар генератара, на што спатрэбілася 2,5 месяца.

Андрэй Ажараўскі не выключыў, што і на другім энергаблоку БелАЭС маглі ўсталяваць турбагенератар з падобнымі праблемамі.

— Другі блок пабудаваны значна пазней, і нібыта вытворца да таго моманту мусіў ліквідаваць выяўленыя дэфекты. Але ж ніхто не кажа, што памылка можа быць толькі адна. Праектанты і інжынеры памыляюцца. Цалкам магчыма, што адключэнне выклікана нейкай яшчэ недапрацоўкай. Бываюць жа не толькі памылкі ў канструкцыі, але і, напрыклад, дэфекты вытворчасці або зборкі, — тлумачыць эксперт.

Паводле слоў фізіка, нават без сур'ёзных наступстваў сам факт прастою з'яўляецца важным паказчыкам.

— Трэба фіксаваць, што ёсць чарговае спыненне. Яно ўплывае на эканамічныя паказчыкі. Улады ж казалі, што БелАЭС — гэта чыста эканамічны праект. Значыць, станцыя павінна працаваць. А яна, бачыце, працягвае выкрутасы. Дзевяцідзённы прастой — гэта сур'ёзная справа, калі б эканоміка была каму-небудзь важная, — адзначае Ажараўскі.

Што да ўтойвання інфармацыі, то, паводле слоў эксперта, атамшчыкі ў цэлым неахвотна ёю дзеляцца.

— Мы ведаем з досведу, што яны стараюцца нявыгадную для іх інфармацыю ўтойваць, а часам і наўпрост хлусіць, — дадае ён.

Нагадаем, гэта не першая няштатная сітуацыя на другім энергаблоку БелАЭС, якую спрабавала ўтаіць кіраўніцтва станцыі. У снежні 2024 года яго адключылі ад сеткі ўначы 4 снежня амаль на два тыдні. 19 снежня пра гэта даведалася і напісала «Zerkalo». Паводле нашай інфармацыі, прычынай стала спрацоўванне абароны з-за парушэння герметычнасці першага контуру, які з'яўляецца носьбітам радыёактыўнага асяроддзя.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com