«Напісаў, што нежанаты і без дзяцей»

Беларусы абмяркоўваюць плюсы і мінусы ID‑карт у параўнанні са звычайнымі пашпартамі.

Беларусы абмяркоўваюць у Threads біяметрычныя дакументы — ID‑карты. Адны задаволеныя «пластыкам», а іншыя сутыкнуліся з цяжкасцямі пры карыстанні імі, піша «Зеркало».

«4 гады таму з-за тэрміновасці зрабіла сабе ID‑карту замест класічнага беларускага пашпарта. Тады карта была адзіным варыянтам, каб паспець вырашыць шмат бюракратычных пытанняў. Потым шмат разоў пашкадавала, — распавяла аўтарка паста. — Сёння (нядаўна. — Заўв. рэд.) пайшла даведвацца, што зрабіць, каб вярнуцца да класічнага пашпарта. Нічога. Скасаваць гэта немагчыма. Нават пры страце мне зробяць толькі біяметрыю. Так сумна стала».

У каментарыях у яе ўдакладнілі, чаму пашкадавала, што перайшла са звычайнага пашпарта на ID‑карту. «Вельмі коратка і тое, што хутка згадалася. Пры вырашэнні пытання па крэдыце трэба было ехаць у абласны цэнтр: толькі там была магчымасць з ID вырашыць пытанне. Не магу забіраць пасылкі мужа, бо няма штампа пра шлюб. Пры здачы крыві прасілі даведку з РСЦ (разлікова-даведачны цэнтр. — Заўв. рэд.). І проста адсутнасць інфармацыі пра прапіску, шлюб», — адказала аўтарка паста.

Вось якія каментары пакінулі пад гэтым тредам:

«ID‑карту зрабіў яшчэ ў самым пачатку. Ні разу не было з ёй праблем».

«Калі дзесьці, напрыклад у бальніцы ці дзяржканторы, ад вас патрабуюць даведку з РСЦ і іншае, спакойна прасіце паперу і асадку, кажучы, што проста цяпер напішаце скаргу на адмову ў абслугоўванні і выстаўленне незаконных патрабаванняў. Усё імгненна «цудадзейным» чынам знаходзіцца. Ім проста лянота. Праверана».

«Вы толькі выйгралі ў доўгатэрміновай перспектыве, зрабіўшы біяметрычны пашпарт. ЕС, напрыклад, рухаецца ў бок паступовага непрызнання звычайных пашпартоў. Такім чынам вы ўсё больш адразалі б сабе шанцы на паездкі за мяжу ў будучыні. Дробныя нязручнасці цяпер нічога не вартыя, а з часам усё роўна давялося б рабіць біяметрычны».

«Гэта ўсё з часам. А людзі сутыкаюцца з праблемамі ўжо цяпер. Біяметрыю можна і за 5 дзён зрабіць, калі спатрэбіцца».

«У мяне з 2023 года, пакуль нідзе не было праблем і пытанняў».

«Год з біяметрыяй, пакуль ні з якімі складанасцямі не сутыкалася, розніцы ўвогуле не заўважыла».

У Threads днямі з’явіўся яшчэ адзін пост, у якім абмяркоўваюць гэты «пластык». «Ужо 5 гадоў як у Беларусі выдаюць пластыкавыя ID‑карты і біяметрычныя пашпарты, але, аказваецца, шмат людзей афармляе сабе звычайныя пашпарты старога ўзору, — адзначыў аўтар паста. — У чым сэнс? Што імі кіруе? ID памерам з крэдытку, і да яе два біяметрыкі. Хіба гэта не ў сто разоў зручней? З сабой носіш картку, адзін пашпарт можаш адправіць у пасольства на візу, з другім — падарожнічаць. На мяжы біяметрычныя пашпарты прапускаюць значна хутчэй, а калі страціш адзін пашпарт — заўсёды ёсць другі».

Пад тредам — амаль 600 каментарыяў.

«Напісаў нежанаты і без дзяцей. Вельмі «зручна» цягаць з сабой усе гэтыя пасведчанні. Вельмі «зручна» было абнаўляць даныя ў банках», — адказаў адзін з карыстальнікаў сацсеткі. Яшчэ адзін у адказ дадаў: «Усюды свае плюсы і мінусы. Мне ID‑біяметрыя больш падышла. Вазіць з сабой пасведчанне аб нараджэнні дзяцей таксама не праблема».

Гэтую дыскусію падтрымаў яшчэ адзін карыстальнік: «Плюс рабіць замежнік. ID‑карта не ўсюды працуе. Паловы інфармацыі ў базе дагэтуль няма. Рэгістрацыя/сямейны стан/дзеці. Чытала, што адзін чалавек у свой двор заехаць не мог, бо было абмежаванне ДАІ. А ў іх не было базы, каб праверыць яго рэгістрацыю. Гэта, атрымліваецца, яшчэ і даведку аб рэгістрацыі і складзе сям’і з сабой вазіць».

«Мне мяняць пашпарт толькі ў 2034 годзе. У 2024-м нават не прапаноўвалі зрабіць біяметрыю. Вось і хаджу са звычайным».

«Ужо гады тры з карткай. Жанаты і з дзецьмі. Нідзе не было праблем. Ніхто ні разу не счытваў карту. Нідзе. Усё ва ўсіх ёсць у базе. Калі што, дык адрас кажу ротам.

З мінусаў: фатаграфуюць капец як жахліва, і чып з карты вываліўся. Прыклеіў — усяго спраў».

«У мяне заканчваўся тэрмін дзеяння пашпарта. Я, як чалавек прагрэсіўны, загадзя патэлефанавала і ўдакладніла, што трэба для афармлення ID‑карты. Мне адказалі: усё тое ж, што і для звычайнага пашпарта, толькі дзяржпошліна вышэйшая. Ну ок. Прыязджаю ў РКЦ (разлікова-касовы цэнтр. — Заўв. рэд.), аддаю дакументы, кажу, што мне патрэбна ID‑карта. Аказваецца, што для яе афармлення трэба ехаць у іншы аддзел, і там жа на месцы фатаграфуюць (пра што ніхто не папярэдзіў). А ў мяне свае фота з сабой. І, дарэчы, яны закрываюцца праз паўгадзіны, але вы можаце паспець (але не факт)».

«Ага, афармлялі з мужам іпатэку. У банку: «А ваша карта па рэестры МУС не б’ецца, прынясіце даведку, што пашпарт дзейны». Счытвальніка няма. Вось табе «зручнасць»».

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com