«Маніфест» «Ляпісаў»: Belarus Freedom! (Аўдыё)

25.09.2008, 9:28

Новы альбом папулярнага беларускага гурта «Ляпіс Трубяцкі» «Маніфест» сёння выкладзены ў Інтэрнэце для бясплатнай запампоўкі.

Гэта першы падобны выпадак сярод топ-артыстаў постсавецкай прасторы. Адна з кампазіцыяў альбома называецца «Belarus Freedom».

Інтэрнэт-рэліз 25 верасня прымеркаваны да пачатку тура «Ляпіса Трубяцкога» па Расеі (16 канцэртаў), які адкрые канцэрт у Пермі.

Новы дыск «Маніфест», як і папярэдні дыск «Капітал», быў запісаны ў Кіеве на студыі «211» пад кіраўніцтвам украінскага саўндпрадзюсэра Віталя Цялезіна. У ім 12 песняў.

У продажы альбом павінен з'явіцца ў кастрычніку. Але з сённяшняга дня альбом «Маніфест» можна запампаваць у Інтэрнэце ТУТ.

«Галоўная задача сучаснага творчага чалавека — пераасэнсаваць і адаптаваць пад цяперашнія рэаліі лозунг DIY — do it yourself, — лічыць лідэр групы «Ляпіс Трубяцкі» Сяргей Міхалок. — І гэта датычыць не толькі анарха-панк-культуры, але незалежнага мастацтва наогул... Карпарацыі, медыя-холдынгі, рэкард-лэйблы і іншыя монстры шоў-бізнэса — гэта гібельны фільтр для любых свежых ідэяў! Продаж аўдыё-носьбітаў, адлічэнні з канцэртаў, аўтарскія паборы кормяць цэлую кучу гэтых дармаедаў, а музыка пры гэтым атрымлівае мізэрныя адсоткі. Ёсць адзіная магчымасць змагацца з калямузычнай сістэмай — трэба ўсім выкладваць музыку ў Інтэрнэт! Тады яна патрапіць да слухача хутка і бясплатна».

Прапануем поўны тэкст песні «Belarus Freedom», а таксама яе аўдыёзапіс.

Слухаць трэк з новага альбома "Ляпісаў":

BELARUS FREEDOM!

Залаты гадзіньнік у чорнай вароны,

Хлопец дурны, як малпа з каронай.

Дзіўны алмаз, эўрапейскія мэты,

Жабы ды чэрці па кабінэтах.

Сэрца палае, далонь не дрыжыць

Ды паляўнічы дамоў бяжыць.

Пагоня побач —

Будзем жыць!

BELARUS FREEDOM!!!