Кіраўнік МЗС Славакіі сустрэўся з беларускімі апазіцыянерамі
4- 7.09.2009, 13:57
Міністр замежных спраў Славакіі Міраслаў Лайчак сустрэўся са старшынём АГП Анатолем Лябедзькам, экс-кандыдатам у прэзідэнты Беларусі Аляксандрам Казуліным і актывістам дэмакратычнага руху Андрэем Кімам.
Як паведаміў БелаПАН Анатоль Лябедзька, падчас сустрэчы абмяркоўвалася сітуацыя ў Беларусі і развіццё адносін паміж рэспублікай і Еўразвязам.
«Лайчак сказаў, што дыялог паміж Бруселем і Менскам зараз ідзе на ўмовах Лукашэнкі, і ў гэтым ён бачыць недахоп. Слабы Лукашэнка вызначае фармат і парадак дня дыялогу з палітычна і эканамічна моцным Бруселем», — адзначыў Лябедзька.
Паводле яго слоў, Лайчак таксама падкрэсліў, што змены, якія адбываюцца ў Беларусі, «носяць касметычны характар». «Ён выступіў за тое, каб у Беларусі пачалі адбывацца незваротныя змяненні», — падкрэсліў Лябедзька.
Лябедзька адзначыў, што Лайчаку былі перададзеныя прапановы Аб'яднаных дэмакратычных сіл па нармалізацыі адносін паміж Беларуссю і ЕЗ, а таксама «дарожная карта» па ўступленні Беларусі ў Раду Еўропы.
«Лайчак сказаў, што яму было важна перад сустрэчамі з прадстаўнікамі ўлады даведацца пра нашу пазіцыю. Вынікі свайго візіту ў Беларусь ён плануе абмеркаваць і на сустрэчы з міністрам замежных спраў Швецыі, якая старшынствуе ў ЕЗ, Карлам Більдтам, якая запланавана на 14 верасня», — сказаў Лябедзька.
Міністр замежных спраў Славакіі прыбыў у Менск з візітам 6 верасня. На сёння запланаваная яго сустрэча з Аляксандрам Лукашэнкам, а таксама міністрам замежных спраў Сяргеем Мартынавым. 7 верасня ў Менску адбудуцца Беларуска-славацкі дзелавы форум і кантактна-кааперацыйная біржа.
