Назіральнікаў АБСЕ пакаралі як школьнікаў
13- 14.12.2010, 15:26
Назіральнікаў ад АБСЕ, якія спазніліся на дзве хвіліны, не пусцілі на паседжанне Магілёўскай абласной выбарчай камісіі.
Пра гэта паведаміў праваабаронца Барыс Бухель, які прысутнічаў у якасці назіральніка на гэтым паседжанні.
«Я паведаміў назіральнікам ад АБСЕ пра тое, што чалец Магілёўскай абласной выбарчай камісіі і прадстаўнік Аб'яднанай грамадзянскай партыі Уладзімір Парфёнаў будзе дамагацца, каб у павестку дня былі ўключаныя пытанні пра дадатковае апячатванне ўрнаў для галасавання і пра тлумачэнне рашэння № 53 Цэнтрвыбаркаму, паводле якога назіральнікам будзе прадстаўленая рэальная магчымасць назіраць за падлікам галасоў, гэта значыць, каб чальцы камісіі распавялі, што пад гэтым разумеецца», - распавёў «Праваабаронцам за сабодныя выбары» Барыс Бухель.
Перад паседжаннем Уладзімір Парфёнаў паказаў свае прапановы старшыню абласной выбарчай камісіі Валеру Берастову.
«Той пасля іх чытання змяніўся ў твары і прыняў рашэнне не пускаць прадстаўнікоў АБСЕ на паседжанне, хутчэй за ўсё з-за таго, каб яны не бачылі працэсу абмеркавання гэтых прапановаў. Тым больш што не пускаць іх была нагода - назіральнікі знаходзіліся на іншай сустрэчы і спазніліся на паседжанне камісіі на некалькі хвілін», - распавёў праваабаронца.