Лукашэнка згадзіўся на ролю «ізгоя» на інаўгурацыі Януковіча

У Кіеве еўрапейскіх прэзідэнтаў пазбавілі ад пагрозы кантакту з беларускім кіраўніком.

Украінскай дыпламатыі пры непасрэдным удзеле беларускага боку ўдалося пазбегнуць мноства непрыемных момантаў, якія маглі б узнікнуць падчас цырымоніі інаўгурацыі новага прэзідэнта Украіны Віктара Януковіча з-за адначасовага ўдзелу ў мерапрыемстве Аляксандра Лукашэнкі і прэзідэнтаў шэрагу еўрапейскіх краін, піша АФН.

Паводле паведамленняў украінскіх СМІ на інаўгурацыю абранага прэзідэнта Украіны Віктара Януковіча прыехалі прэзідэнты Латвіі Валдзіс Затлерс, Літвы Даля Грыбаўскайтэ, Польшчы Лех Качыньскі, Македоніі Георге Іваноў, Венгрыі Ласло Шаём, Чарнагорыі Філіп Вуяновіч.

Саму прысутнасць Лукашэнкі ў гэтай цеснай прэзідэнцкай кампаніі нават уявіць складана - фота паціскаючых рукі Лукашэнкі і Качыньскага імгненна стала б хітом № 1 ва ўсім свеце. Але дзякуючы ўгаворам або асабістай ініцыятыве госця, еўрапейскіх прэзідэнтаў пазбавілі ад пагрозы непасрэднага кантакту з беларускім дыктатарам.

Лукашэнка выдатна адыграў сваю ролю ў гэтым палітычным спектаклі. Ён нібыта спазніўся на цырымонію, хоць прыляцеў у Кіеў яшчэ напярэдадні вечарам. У сваю чаргу, спікер Вярхоўнай рады Украіны Уладзімір Літвін надаў гэтаму факту натуральную афарбоўку. Зачытваючы ў спісе запрошаных на інаўгурацыю кіраўнікоў дзяржаў прозвішча Лукашэнкі, ён даў зразумець усім, што Лукашэнкі ў дадзены момант у залі няма.

Беларускі госць зайшоў у залу крыху пазней і каб не перашкаджаць асалодзе запрошаных ад прагляду палітычнага блокбастэра «Януковіч - прэзідэнт Украіны», не стаў прабірацца да свайго месца ў адведзеным для прэзідэнтаў сектары памяшкання («Прабачце... Прабачце... Аказваецца, пробкі ў Кіеве...»). За інаўгурацыяй Лукашэнка, якому было дазволена ўзяць з сабой на інаўгурацыю свайго сына Мікалая, назіраў, седзячы побач з жонкай Януковіча (у суправаджэнні ўнука) - скажам, таксама не дробная ад сённяшняга дня палітычная фігура ва Украіне. Гэтакі дзіцячы куток....

У якасці падзякі за жэст добрасуседскай палітычнай волі, Януковіч паабяцаў знайсці час у шчыльным графіку столь знамянальнага для сябе дня і правесці двухбаковыя перамовы з Лукашэнкам. Зрэшты, сустрэча з новым прэзідэнтам Украіны для беларускага боку сёння ўяўляецца больш актуальнай, чым тусоўка з такімі палітыкамі як Качыньскі, Затлерс і Шаём.

«У адносінах нашых дзвюх краін наступае новы этап. Мы гатовыя разам з вамі разгледзець усе асноўныя стратэгічныя напрамкі развіцця нашых адносін. Я гатовы працаваць разам з вамі, каб эканамічныя добрасуседскія адносіны паміж нашымі краінамі дынамічна развіваліся. Я не забыўся і не забуду радзіму сваіх продкаў - Віцебскую вобласць», - выканаў сваю ролю Віктар Януковіч на сустрэчы з Лукашэнкам.