23 кастрычнiка 2021, Субота, 20:04
Сім сім, Хартыя 97!
Рубрыкі

Андрэй Саннікаў: Я застаюся кандыдатам у прэзідэнты і патрабую другога тура

467
Андрэй Саннікаў: Я застаюся кандыдатам у прэзідэнты і патрабую другога тура

Асуджаны кандыдат у прэзідэнты Беларусі даслаў з турмы зварот да беларусаў.

Прыводзім тэкст звароту Андрэя Саннікава цалкам:

- Сёння Беларусь перажывае самы сур'ёзны крызіс за 20 гадоў сваёй незалежнасці. Цяжкая сітуацыя ў эканоміцы, валютна-фінансавай, сацыяльнай і палітычнай сферах з'яўляецца прамым следствас беззаконня ўладаў падчас прэзідэнцкіх выбараў 2010 года. Крэдыт даверу, які выдавалі уладам напярэдадні выбараў грамадзяне Беларусі, нашыя суседзі, уся сусветная супольнасць, быў не проста падарваны: рэжым выкарыстаў яго, каб нахабна і цынічна абрабаваць народ Беларусі, выкрасці ў выбаршчыкаў галасы, пазбавіць іх права выбару.

На жаль, апраўдваюцца самыя горшыя прагнозы развіцця сітуацыі ў Беларусі пасля выбараў. Утрыманне ўлады Лукашэнкам прывядзе нашую краіну да катастрофы. Няздольнасць цяперашняга рэжыму кіраваць Беларуссю была відавочная даўно і сёння выяўляецца ва ўсіх сваіх згубных наступствах. Ніякія ракіроўкі адданых слугаў рэжыму ў складзе ўрада ў межах існуючай палітычнай сістэмы не дадуць ніякіх станоўчых вынікаў. Далейшага росквіту «стабільнасці» Беларусь не вытрымае.

Сусветная супольнасць не прызнала вынікаў прэзідэнцкіх выбараў у Беларусі. Гэта адбылося не ўпершыню, але ў гэты раз з ўсёй відавочнасцю зразумела, што Лукашэнка не ўспрымаецца больш як партнёр у міжнародных адносінах нікім: ні Еўропай, ні Расеяй, ні ЗША. У яго няма падтрымкі ў Беларусі. Ніякія прапагандысцкія замовы на міфічных адсотках, нібыта атрыманых Лукашэнкам на выбарах, нікога не ўводзяць у зман. Нават у КДБ, як я змог пераканацца, не вераць у абвешчаныя вынікі і добра ведаюць аб фальсіфікацыях. Беларускія і міжнародныя назіральнікі адназначна зафіксавалі шматлікія парушэнні і фальсіфікацыю вынікаў галасавання.

Як кандыдат у прэзідэнты на выбарах 2010 года я не прызнаю іхніх вынікаў і лічу іх сфальсіфікаванымі. Лічу, што далейшае захаванне ў Беларусі цяперашняй улады і цяперашняй палітычнай сістэмы пагражае цяжкімі наступствамі для краіны, і перш за ўсё - для дабрабыту грамадзян.

У той жа час я перакананы, што сёння захоўваецца магчымасць выхаду з крызісу. Я нават гатовы прызнаць, што 19 снежня 2010 года адбылося галасаванне на прэзідэнцкіх выбарах у Беларусі. Вынікі гэтага галасавання, паводле ацэнак унутраных і міжнародных назіральнікаў, сведчаць аб тым, што першы тур не выявіў пераможцу выбараў. Лукашэнку неабходна прызнаць, што 19 снежня 2010 года ён не набраў неабходных для перамогі 50 адсоткаў галасоў.

Нягледзячы на ​​публічныя запэўненні Лукашэнкі, што сярод альтэрнатыўных кандыдатаў лідзіруе іншы чалавек, ЦВК быў вымушаны прызнаць другім мой вынік.

Калі Лукашэнка ў стане адэкватна ўспрымаць рэальнасць і сапраўды лічыць, што ў яго ёсць падтрымка ў народзе, то прэзідэнцкія выбары неабходна завяршыць. Гэта верне ў Беларусь законнасць і спыніць катастрофу, якая на нас насоўваецца.

Я не складаю з сябе паўнамоцтваў кандыдата ў прэзідэнты Рэспублікі Беларусь і патрабую правядзення другога тура прэзідэнцкіх выбараў пад міжнародным кантролем. Прашу грамадзян Беларусі падтрымаць гэтае маё патрабаванне. Лёс краіны сёння залежыць ад кожнага з нас.

Каардынатар грамадзянскай кампаніі «Еўрапейская Беларусь» Андрэй Саннікаў, які з'яўляецца асноўным супернікам Лукашэнкі на выбарах, быў прысуджаны да 5 гадоў калоніі ўзмоцненага рэжыму. У цяперашні час ён знаходзіцца ў СІЗА ГУУС Менгарвыканкама, адкуль яго этапуюць у калонію. З патрабаваннем вызваліць палітыка выступілі кіраўнікі вядучых краін свету, Еўразвяз і ЗША.