Андрэй Скурко: Мы не будзем радыкалізоўвацца

Мінінфармацыі можа пакараць «Нашу Ніву» вялікім штрафам.

Як ужо паведамлялася, Міністэрства інфармацыі папрасіла Вярхоўны суд вярнуць пазоўную заяву аб спыненні выпуску газеты «Наша Ніва». Суд задаволіў просьбу і пакінуў пазоў міністэрства да газеты без разгляду.

«Гэта быў абсалютны сюрпрыз. Мы дзякуем усім, хто прыйшоў сёння ў залу суда. Такой развязкі сапраўды не чакаў ніхто. Я спадзяюся, што заўтра ў Вышэйшым гаспадарчым судзе разгляд справы «Народнай волі» скончыцца такім жа чынам», - сказаў «Еўрарадыё» па заканчэнні працэсу галоўны рэдактар ​​газеты Андрэй Скурко.

Наконт магчымай змены рэдакцыйнай палітыкі ў сувязі з апошнімі падзеямі вакол газеты і наконт таго, ці стане «Наша Ніва» больш асцярожнай, Андрэй Скурко адказаў: «Мы не будзем радыкалізоўвацца».

Але справа можа аднавіцца, бо ў газеты ёсць папярэджанні. Таму могуць рушыць услед новыя позвы ў суд. На думку Андрэя Скурко, газету могуць пакараць фінансава.

«Справа можа аднавіцца, яны могуць даслаць новыя позвы. Таму што ёсць папярэджанні ў нас, ёсць падстава для гэтага юрыдычная. Але спадзяюся, што гэтага не адбудзецца. Апошняе папярэджанне патрэбнае было, напэўна, для таго, каб даць нам вялікі штраф. «Наша Ніва» не магла быць зусім не пакараная. Адпаведна, нас пакараюць штрафам, я так думаю», - кажа журналіст.

На думку старшыні Беларускай асацыяцыі журналістаў Жаны Літвіной, такое рашэнне можа быць выкліканае і эканамічнымі прычынамі:

«Я думаю, у апошні час усё роўна вельмі многія дзеянні любой абсалютна галіны ўлады дыктуюцца эканомікай. Магчыма, пасля шматлікіх кансультацый, магчыма, і дзякуючы цвёрдасці пазіцыі еўрапейскіх інстытутаў мы сёння атрымалі такі вынік. Я вельмі радая за сваіх калегаў, «Наша Ніва» і «Народная Воля», гэтыя газеты - сімвалы незалежнай прэсы».

На сайце Мінінфармацыі паведамляецца, што пазоў адкліканы ў сувязі са «зваротам рэдакцыі выдання і магчымасцю пазасудовага ўрэгулявання сітуацыі, зыходзячы з прынцыпу свабоды масавай інфармацыі».