У Гомелі суд апраўдаў апазіцыянера

11 студзеня суд Цэнтральнага раёна Гомеля спыніў адміністрацыйную справу за дробнае хуліганства адносна грамадскага дзеяча, пенсіянера МУС Уладзіміра Няпомняшчых.

Судовы працэс вяла суддзя Алена Цалкова.

Справа гэта цягнулася з 7 кастрычніка мінулага года, калі Уладзіміра Няпомняшчых міліцыянты затрымалі на праспекце Леніна падчас расклейкі налепак аб Народным сходзе. Супраць яго склалі два адміністрацыйныя пратаколы - за парушэнне парадку арганізацыі масавага мерапрыемства і нецэнзурную лаянку, перадае «Радыё Свабода».

Актывіста аштрафавалі двойчы. Да таго ж Уладзімір адседзеў больш за двое сутак у ізалятары, куды яго прэвентыўна змясціла міліцыя па распараджэнні намесніка начальніка Цэнтральнага РАУС Андрэя Пархоменкі.

Расклейку налепак Уладзімір Няпомняшчых не адмаўляў, а штраф за дробнае хуліганства абверг.

Пра лаянку напісаў у рапарце толькі адзін міліцыянт - оперупаўнаважаны крымінальнага вышуку маёр міліцыі Валер Амельчанка. Ніхто іншы, акрамя Амельчанкі, гэтую лаянку не чуў.