Разнос у НАКе: Крадуць усе

Лукашэнка выявіў карупцыю сярод сваіх падначаленых у Нацыянальным алімпійскім камітэце.

Аляксандр Лукашэнка папярэдзіў, што факты карупцыі ў сферы беларускага спорту будуць жорстка спыняцца, прызнаўшы, што такія правапарушэнні мелі месца сярод былых прадстаўнікоў выканкама Нацыянальнага Алімпійскага камітэта, паведамляе «Інтэрфакс».

«Вызвалены віцэ-прэзідэнт атрымліваў зарплату, роўную прэзідэнцкай, а часам і больш. Прадстаўніцтвы НАК мелі такую зарплату, што сорамна называць. Больш за тое, некаторыя кінуліся вырашаць свае асабістыя пытанні за кошт НАКа і дзяржавы», - заявіў Лукашэнка ў чацвер на пасяджэнні абноўленага выканкама НАК.

«Я кажу пра вашу асабістую прыстойнасць. Я менш за ўсё цяпер пра гэта ўспамінаю, але вы ведаеце, што даравання на ніве карупцыі не будзе», - падкрэсліў кіраўнік. Таму, заявіў ён, «даходы кіраўніцтва выканкама НАК павінны быць прывязаны да міністэрства спорту і турызму».

Лукашэнка таксама папярэдзіў, што «не павінна быць адцягнення сродкаў на мэты, не звязаныя з развіццём спорту, і асабліва на асабістыя расходы спартыўных чыноўнікаў».

Кіраўнік разлічвае, што новае кіраўніцтва спартыўнай галіны краіны зможа пераламаць негатыўныя тэндэнцыі ў гэтай сферы і вывесці беларускі спорт на новы ўзровень.

«Гэта людзі не выпадковыя у спорце і ў сістэме кіравання - гэта мужыкі моцныя. Людзі, якія любяць спорт і якія маюць досвед працы ў гэтай сферы», - заявіў ён, кажучы аб новым міністры спорту і турызму Аляксандры Шамко, памочніке кіраўніка дзяржавы па спорце Максіме Рыжанкове і першым віцэ-прэзідэнце НАК Ігары Рачкоўскім.

Гаворачы аб прыняцці кадравых рашэнняў, Лукашэнка адзначыў: «па-першае, гэта павінны быць людзі з боку, а не гэтыя кандыдаты сярод так званых «спецыялістаў па спорце». «Таму што мяне насцярожвае не толькі бяздзейнасць былых кіраўнікоў, але і факты карумпавання гэтых людзей. Таму кланавасці трэба было пазбегнуць, і таму я прызначаў і рэкамендую людзей з боку», - растлумачыў Лукашэнка.

Па-другое, паводле яго слоў, «гэта людзі, якія разумеюць у спорце і любяць спорт». «Людзі, якія не бегалі, не скакалі, клюшку не трымалі ў руках, не могуць быць кіраўнікамі ў спорце», - адзначыў ён.

«Што тычыцца нейкіх разваг з нагоды нейкіх падводных плыняў, то, паверце, такога няма. Прызначэнні на любыя пасады не павінны адбывацца па прынцыпе адданасці», - падкрэсліў Лукашэнка.

Нагадаем, сёння кіраўнік прызначыў сваіх намеснікаў па НАК.

Гаворачы аб Рыжанкове, сваім новым памочніке па спорце, фізічнай культуры і турызму, Лукашэнка нагадаў, што яго бацька калісьці ўзначальваў Мінспорту і НАК Беларусі. «Але справа не толькі ў бацьке, хоць, я спадзяюся, што ён будзе такім жа прынцыповым, таму што гэта сын свайго бацькі. Гэта прынцыповы чалавек, які хоча дабра свайму народу, краіне, які захапляецца спортам і які займаецца спортам», - сказаў ён.

Лукашэнка адзначыў, што «спорт сёння стаў не толькі вялікай палітыкай, але і эканомікай». «А гэтыя людзі добра ведаюць эканоміку, - падкрэсліў ён. - Для спорту стала важнай рысай разбурэнне нацыянальных межаў і выхад на шырокае поле міжнародных адносін. Але галоўнае, наколькі я ведаю, гэта людзі, якія заўзеюць за краіну і спорт, і якія ў стане асвоіць тое, што сёння ёсць, і мадэрнізаваць сістэму», - дадаў Лукашэнка.