Corriere della Sera: медзведзяняты-парашутысты ўвялі ў крызіс апошняга дыктатара Еўропы

Над самым мілітарызаваным рэжымам на кантыненце пасмяяліся два шведскіх пілота.

Аляксандр Лукашэнка загадаў новаму камандуючаму ВПС знішчаць усіх парушальнікаў паветранай прасторы краіны, піша італьянская газета Corriere della Sera (пераклад - inopressa.ru).

«Атрад з тысячы плюшавых медзведзянятаў-парашутыстаў увёў у крызіс апошняга дыктатара Еўропы? Калі еўрапейскія санкцыі і водгук амбасадараў не прывялі да змякчэння пазіцый Аляксандра Лукашэнкі, гаспадара і ўладара Беларусі, быць можа, камічны эпізод з плюшавымі цацкамі неяк паўплывае на сітуацыю», - піша выданне.

«Над самай мілітарызаванай краінай на кантыненце пасмяяліся два шведскіх пілота: на лёгкаматорным самалёце яны пераадолелі супрацьракетную абарону і даляцелі да прыгарадаў Менска, каб скінуць на горад медзведзянятаў-парашутыстаў. Лукашэнка спачатку абвяргаў усё, але потым на Youtube апынулася відэа, і кіраўнік узяўся за генералаў: былі адпраўленыя ў адстаўку камандуючы СПА краіны і камандуючы памежнымі войскамі. Быў арыштаваны і журналіст Антон Сурапін, якога абвінавацілі ў распаўсюдзе паведамлення. Хоць ён не меў ніякага дачынення да шведскіх пілотаў, яму пагражае пакаранне тэрмінам ад 3 да 5 гадоў турмы. Amnesty International ўжо абвясціла яго вязнем сумлення. І вось 3 жніўня Лукашэнка выправадзіў шведскага амбасадара, афіцыйна - за кантакты з унутранай апазіцыяй», - піша аўтар артыкула.

«Лукашэнка загадаў не падаўжаць візу шведскаму амбасадару, а шведы, са свайго боку, выправадзілі трох беларускіх дыпламатаў. Кэтрын Эштан, вярхоўны прадстаўнік ЕЗ па замежных справах і палітыке бяспекі, заявіла аб «занепакоенасці» у сувязі з паведамленнямі, што паступаюць з Беларусі, і абяцала , што пытанне будзе разгледжана на еўрапейскім узроўні з мэтай прыняцця «адпаведных мер», - гаворыцца ў артыкуле.