У парку Горкага ў Менску абваліўся дах атракцыёну

Атракцыёны не вытрымалі доўгай зімы. У парку Горкага абваліўся дах на аўтадроме.

Металічная канструкцыя прагнулася пад цяжарам снегу і абвалілася. Чаму дзіцячаму атракцыёну далі патануць у снежнай лавіне, што ў выніку прывяло да такіх сумных наступстваў, СТВ пацікавілася ў кіраўніцтва гарадскога парку. Як ні парадаксальна, але там запэўнілі, што ніякага абвалу даху і не было.

Галоўны інжынер УП «Гарадскія паркі» Менскзеленбуд Юрый Ганчароў заявіў, што «гэта планавы рамонт».

«Справа ў тым, што ў нас быў вызначаны планавы рамонт даху аўтадрома і не толькі ў парку Горкага. Вось цяпер у нас ідзе рамонт атракцыёну ў парку Горкага. Ніякага абвалу не было», - сказаў ён.

Толькі вось няўдача. Калі ў аўтадроме праходзяць работы па рэканструкцыі, то чаму ён да гэтага часу не расчышчаны ад снегу?

Нагадаем, два дні таму пад цяжарам снегу ў Рагачоўскім раёне на рабочага абрынуўся дах цэха. Тады мужчына памёр ад атрыманых траўмаў.