Лепшыя беларускія медыкі з'язджаюць у Расею

Праблема кадраў у беларускай ахове здароўя яшчэ больш абвастрылася з уступленнем Беларусі ў Адзіную эканамічную прастору.

Такое меркаванне «Радыё Рацыя» выказаў рэаніматолаг Рэспубліканскага навукова-практычнага цэнтра «Маці і дзіця» Андрэй Вітушка.

- Ёсць фактар Расеі, якая выцягвае працоўныя рэсурсы. Расея - багатая краіна. Яна траціць шмат грошай на пераабсталяванне сваіх медыцынскіх устаноў, з вялікім задавальненнем прымае нашых лекараў. І гэты працэс - колькі бы на гэта ні заплюшчвалі вочы і ні думалі, што такога няма, - рэальны і будзе ўзмацняцца.

У Беларусі рыхтуюцца папраўкі ў Закон аб ахове здароўя. Яны павінны рэфармаваць сістэму медыцынскай дапамогі. Галоўнай прычынай, чаму лекары з'язджаюць у Маскву, з'яўляюцца маленькія зарплаты.