Свінаводам-бунтарам пагражаюць турмой

Тым, хто адмовіцца зарэзаць сваіх свіней, пагражаюць двума гадамі турмы.

За невыкананне і парушэнне ветэрынарна-санітарных правілаў вырошчвання свіней прадугледжаная адміністрацыйная і крымінальная адказнасць.

Пра гэта гаворыцца ў заяве дэпартамента ветэрынарнага і харчовага нагляду Міністэрства сельскай гаспадаркі і харчавання Беларусі.

«У адпаведнасці з ветэрынарна-санітарнымі правіламі вырошчвання свіней забараняецца ўтрыманне свіней у асабістым падворку работнікаў, якія абслугоўваюць пагалоўе свіней комплексу, а таксама ў радыусе не менш за 5 км ад комплексаў утрыманне свіней сялянскімі (фермерскімі) гаспадаркамі і фізічнымі асобамі, у тым ліку індывідуальнымі прадпрымальнікамі», - гаворыцца ў паведамленні.

Адзначаецца, што за невыкананне ветэрынарных правілаў прадугледжаная адміністрацыйная і крымінальная адказнасць. Паводле Кодэкса аб адміністрацыйных правапарушэннях за парушэнне ветэрынарных правілаў прадугледжанае папярэджанне або штраф да 20 базавых велічынь (Br2 млн).

«Парушэнне ветэрынарных правілаў, якое пацягнула па неасцярожнасці распаўсюджванне заразных хвароб жывёл, цягне крымінальную адказнасць: абмежаванне або пазбаўленне волі на тэрмін да двух гадоў», - папярэджвае Мінсельгасхарч Беларусі.

Нагадаем, у Беларусі ў пачатку ліпеня быў выяўлены другі ачаг афрыканскай чумы свіней (АЧС). Захворванне пацверджана ў Віцебскай вобласці. Першы ачаг быў знойдзены ў Гродзенскай вобласці. Першыя вынікі расследавання па факце заносу віруса паказалі, па паведамленнях уладаў, што захворванне занесенае з кармамі для жывёл, увезеных з тэрыторыі Расеі.

У канцы ліпеня ў Беларусі забаранілі ўтрымліваць свіней у асабістых гаспадарках ў радыусе не менш за пяць кіламетраў ад свінакомплексаў. Жывыя свінні і прадукты іх забою, якiя перамяшчаюцца ў парушэнне абмежаванняў, устаноўленых сапраўднымі ветэрынарна-санітарнымі правіламі, падлягаюць канфіскацыі і неадкладнаму знішчэнню. Жыхары некаторых вёсак ужо адмовіліся забіваць сваіх свіней.