«Калі хоць 1% дармаедаў падымецца - будзе новая ўлада»

Сёлета хочуць сабраць двайны падатак з беспрацоўных.

Праз апошнія змяненні ў дэкрэце «Аб папярэджанні сацыяльнага ўтрыманства» ў 2017 годзе беларусам давядзецца заплаціць збор адразу за два папярэднія падатковыя перыяды, піша блогер d-zholik.

Усе асобы, якія не выплацілі летась збор на фінансаванне дзяржаўных выдаткаў за 2015 год, абавязаны зрабіць гэта не пазней за 20 лютага гэтага года. Пры адсутнасці падатковых вылікаў сума збору складзе - 360 рублёў.

Асобна гэтыя ж асобы не пазней як 15 лістапада павінны заплаціць збор за 2016 год - 420 рублёў.

Што ў агульнай суме па цяперашнім курсе складае - 400 даляраў ЗША.

Гэтая сума ў некалькі разоў перавышае ўзровень сярэднямесячнага заробку ў большасці раёнаў краіны і для велізарнай масы беларускіх сем'яў стане наймацнейшым ударам.

Паводле звестак намесніка начальніка падатковай інспекцыі Шчучынскага раёна, у гэтым раёне больш за 2,5 тысячы чалавек прызнаныя сацыяльнымі ўтрыманцаў, з якіх 1800 ужо атрымалі паведамленні на выплату збору і толькі 115 заплацілі неабходную суму.

У той жа час, паводле звестак управы працы, занятасцi i сацыяльнай абароны Шчучынскага райвыканкама, на 1 студзеня 2017 года наймальнікамі заяўленыя звесткі аб наяўнасці ўсяго 275 свабодных вакансій, з якіх 54,9% складаюць прафесіі рабочых.

Асноўныя прадпрыемствы раёна маюць цяжкасці з замовамі і збытам, працоўныя калектывы пераведзеныя на няпоўны працоўны тыдзень, працуюць да абеду альбо сядзяць дома за свой кошт.

Яшчэ чатыры гады таму ў раённай паліклініцы на ўліку ў нарколага знаходзілася блізу 2000 асоб, якія пакутуюць на алкагалізм, з якіх больш за 450 - жанчыны.

У мясцовым аддзеле прымусовага выканання, які ўзначальвае намеснік начальніка Шчучынскага РАУС, які выйшаў на пенсію, знаходзіцца амаль 9 тысяч выканаўчых дакументаў.

Пры гэтым улады адкрыта запалохваюць мясцовае насельніцтва штрафамі і арыштамі ў выпадку нявыплаты збору на фінансаванне дзяржаўных выдаткаў.

Адзіным выхадам з сітуацыі, якая склалася, можа быць толькі скасаванне збору за 2015 год ці поўнае скасаванне самага дэкрэта.

Улічваючы, якую хвалю абурэння выклікаў у беларускім грамадстве сам факт увядзення гэтага збору, няцяжка спрагназаваць маштаб наступстваў, выкліканых неабходнасцю яго выплаты ў падвойнай суме. У агульнай складанасці гэта непасрэдна закране больш за 400 тысяч грамадзян (без уліку іх сем'яў), і калі хаця б 1% ад гэтай масы возьмецца за сякеры і вілы - у краіне ўсталюецца новая ўлада.

Нагадаем, што 17 лютага а 18-00 на Кастрычніцкай плошчы Менска пачнецца Марш раззлаваных беларусаў з патрабаваннем скасавання дэкрэта аб «дармаедах».