Рахунак 2018.: На колькі вырастуць выдаткі на камунальныя паслугі ў тыпавой кватэры

Улады ўжо анансавалі рост тарыфаў на паслугі ЖКГ у 2018 годзе.

Цяпер чыноўнікі працуюць над узгадненнем так званага «тарыфнага сшытка». На прыкладзе канкрэтнага рахунку журналісты tut.by палічылі, колькі будзе аддаваць сярэднестатыстычная сям'я з 3 чалавек, якая жыве ў стандартнай двухпакаёўцы, калі цэннік на камуналку зацвердзяць у прапанаваным варыянце.

Выданне адразу агаворваецца, што ў падліках могуць быць некаторыя хібнасці.

Такім чынам, журналісты ўзялі самы свежы рахунак (за верасень, дзе ўлічана апошняе падаражанне камуналкі). У кватэры прапісаныя 3 чалавекі - двое дарослых і малое дзіця. Плошча кватэры - без малога 47 квадратных метраў. Дом - тыпавая 9-павярховая панэлька ў сталіцы.

Вось што атрымалася ў выніку.

Некаторыя асаблівасці нашых падлікаў:

у вераснёвым рахунку яшчэ няма ацяплення, але яго дадалі, зыходзячы з расходу студзеня-2017 (самы халодны месяц мінулага ацяпляльнага сезона) і сённяшніх тарыфаў;

у «тарыфным сшытку» пакуль не выдзеленыя асобна расцэнкі на капрамонт, але, як вядома, гэтая лічба звычайна прывязаная да тэхабслугоўвання (раней яны ўвогуле былі аднолькавымі). Таму разлік на 2018 год у нас прыкладны - зыходзячы з розніцы паміж сённяшнімі тарыфамі - цяпер гэта менш за рубель. Але на справе ў кожным канкрэтным доме лічбы будуць іншымі, але не думаем, што значна большымі ці меншымі.

Графа «вываз смецця» ў цяперашнім рахунку прывязаная да колькасці адходаў, «тарыфны сшытак» прапаноўвае лічыць кошт у залежнасці ад колькасці насельнікаў, што мы і зрабілі;

аплата ліфта ў ранейшым і новым рахунку палічаная за 2 чалавекі - дзіцяці ў гэтай сям'і яшчэ няма 7 гадоў, і яно катаецца ў ліфце бясплатна;

нягледзячы на наяўнасць маленькага дзіцяці, а таксама сталую працу пральнай машыны, посудамыйнай машыны і іншых прыбораў, сям'я ўкладаецца ў нарматывы выдаткаў вады і электрычнасці.

некаторыя паслугі не ўказаныя ў «тарыфным сшытку» (напрыклад, асвятленне пад'езду), таму мы палічылі іх сённяшнім тарыфам. На справе яны, хутчэй за ўсё, падаражэюць.

На падлік журналістаў, рахунак у тыпавой двухпакаёўцы з трыма жыхарамі пацяжэе на амаль на чвэрць. Адбудзецца гэта, хутчэй за ўсё, у два этапы - у снежні 2017 года (чарговая індэксацыя) і ў студзені 2018 (новыя тарыфы).

Значыць, за студзень наша сям'я заплаціць за камуналку мінімум на 14 рублёў больш пры ўмове, што спажыванне паслуг не зменіцца. На гэтыя грошы можна купіць, напрыклад, 6 слоічкаў агародніннага пюрэ для дзіцяці, па 3 кіло яблыкаў і груш, 10 дзясяткаў яек ці 5-6 пачкаў тварагу.

Дарэчы, заўтра ў Палацы Незалежнасці пройдзе пасяджэнне камунальнікаў і чыноўнікаў розных узроўняў з удзелам Лукашэнкі. Не абыдзецца і без абмеркавання кошту паслуг ЖКГ. Так што, магчыма, мы пачуем меркаванне дыктатара і аб «тарыфным сшытку».