«Дзе ж там паляжаць побач з народам у звычайных лякарнях з крыклівымі санітаркамі?»

Чарговы сюжэт для тэатра абсурду.

«У краіне, што пазіцыянуе сябе як сацыяльная дзяржава - «дзяржава для народа» - будуюцца лякарні для чыноўнікаў, дзе простыя людзі змогуць лячыцца толькі за грошы. Чым не сюжэт для тэатра абсурду!» - піша Дзмітры Растаеў на сваёй старонцы ў «Фэйсбуку».

«Галоўнае пытанне, які ўзнікае ў кожнага, хто сябруе з логікай: чаму наогул славутыя «слугі народа» павінны лячыцца асобна ад гэтага народа? Яны што, нейкай іншых крыві? Або арганізмы ў іх іншыя і патрабуюць нейкага асаблівага падыходу? Чаму народ павінен мучыцца ў старых, зруйнаваных шпіталях, тады як «слугі», якія давялі яго да такога «шчасця», атрымліваюць адну звышклініку за другой?

Калі вы апелюеце народам з кожнай нагоды - народ у нас тое, народ у нас сёе, народ даў нам уладу, народ нам не даруе - то, што ж гэта вам так цяжка паляжаць побач з гэтым народам у звычайных лякарнях, з крыклівымі санітаркамі і абшарпанымі сценамі? Ды не ў палаце, а на калідорчыку, як гэта часта бывае - палат, хай будзе вам вядома, на ўсіх не стае. Хоць вам гэта і так вядома - інакш не будавалі б сабе асобныя медычныя рэзідэнцыі.

І што гэта за адгаворка, маўляў, «так ва ўсіх дзяржавах прынята»? У якіх гэта «ўсіх дзяржавах»? Можа, у Берліне ёсць спецлякарня для чальцоў Бундэстагу? Або ў Стакгольме адкрылі нейкі спецшпіталь для чальцоў Дзяржрады? Ды там дзяржчыноўнікі у грамадскім транспарце не грэбуюць ездзіць - не тое, што спецклініку сабе збудавалі! «Ва ўсіх дзяржавах...»

Усе гэтыя спецлякарні са спецдварцамі як нельга лепш ілюструюць фальшывую, ілжывую, крывадушную сутнасць рэжыму, які сыходзіць каранямі ў такі ж фальшывы, хлуслівы і крывадушны савецкі рэжым. Які так жа выкарыстаў народ у якасці шырмы, і гэтак жа адгароджваўся ад яго парканамі спецклінік і спецразмеркавальнікаў. Але і фінал яго будзе такім жа ганебным».

P.S. У Бабруйску каторы ўжо год не могуць адрамантаваць дзіцячую лякарню - няма грошай. Гэтай восенню грошы ў добраахвотна-прымусовым парадку трэслі з работнікаў гарадскіх прадпрыемстваў і арганізацый. Гэтак жа, як летась трэслі на дзіцячую лякарню ў Гомелі. Трэслі з людзей, якія і так, між іншым, плацяць падаткі. Падаткі, на якія павінны ўтрымлівацца, у тым ліку, дзіцячыя лякарні. Але на дзяцей у «слуг» грошай няма. На сябе любых - колькі заўгодна!»