Як савецкая прапаганда апавядала пра гандаль у БССР
15- 10.12.2017, 19:05
- 30,804
Архіўныя відэакадры з «камуністычнага раю».
Менскі супермаркет узору 1956 года, продаж тавараў у крэдыт і распродажы проста ў цэхах завода – tut.by пабачыў, як выглядаў гандаль у БССР больш за паўстагоддзя таму.
Брудныя грошы
На кінакадрах – адна з новых менскіх крамаў без прадаўца. «Тут усё прадугледжана для таго, каб захаваць прадукты ад пранікнення пылу і мікробаў. Зручна і гігіенічна», – гаворыць голас за кадрам.
Потым для кантрасту на экране паказваюць краму, дзе гандлююць зусім па-іншаму: «Тыя ж рукі, якія бяруць хлеб, лічаць і грошы. А, як вядома, грошы бываюць у многіх руках і іншы раз вельмі забруджаных. Прадавец нават не прыкмячае, колькі ён можа разнесці розных мікробаў сваімі рукамі. Хочацца спытаць міністра гандлю рэспублікі, а ці ведае ён аб гэтых непаладках?»
Крэдыт на «ўсё, што бачыце»
Краму «Прамтавары», пра якую ідзе гаворка ў відэа, дыктар называе «незвычайнай».
– Вось напрыклад стропальшчык Міхаіл Гузуль надумаў набыць да свята новы гарнітур. Гарнітур нядрэнны, але кошт яго Міхаіл выплаціць у растэрміноўку, – кажа ён.
– А-а-а! Тут, значыць прадаюць тавары ў крэдыт, – паўтарае за ім жаночы голас.
Потым на кінакадрах паказваюць краму электронікі і побытавай тэхнікі.
– А што ў гэтым магазіне можна купіць у крэдыт? – пытаецца той самы жаночы голас.
– Усё, што бачыце! – адказвае мужчына за кадрам.
У прыклад прыводзяць працоўнага Аляксандра Пятровіча Сакалова, які ў краму прыйшоў са сваёй жонкай. На кадрах яны разам выбіраюць швачную машыну.
– І думка жонкі бясспрэчна вызначальная, – кажа жаночы голас за кадрам.
– Не спрачаюся. Тым больш, што вядзецца пра яўна жаночую пакупку, – згаджаецца дыктар.
– Сапраўды, продаж тавараў у крэдыт вельмі зручны і выгодны для працоўных, – рэзюмуе мужчына ў канцы відэа.
Распродаж проста на працоўным месцы
«Незвычайная аб'ява з'явілася ў цэхах Гомельскага станкабудаўнічага завода імя Кірава», – так пачынаецца рэпартаж. Гаворка ідзе пра распродаж прамысловых тавараў, якія Гомельскі ўнівермаг арганізаваў проста ў цэху завода.
– Гэта вельмі зручна: патрэбную рэч можна набыць тут, недалека ад свайго працоўнага месца, – гаворыць голас за кадрам.
Не трэба працоўным хвалявацца і пра дастаўку набытых тавараў: «Пра гэта паклапаціліся супрацоўнікі ўнівермага».