Прывабнасць рубля прадаўжае зніжацца

Надзеям Нацбанка не наканавана спраўдзіцца.

Cфармавалась відавочная тэндэнцыя да паслаблення беларускага рубля ў дачыненні да кошыка валют, падобна да таго, як гэта было ў канцы мінулага года, піша Уладзімір Тарасаў для сайта «Белорусы и рынок».

Прадоўжылася і тэндэнцыя зніжэння ставак рублёвых інструментаў. На аўкцыёне, які адбыўся 29 лістапада, па размяшчэнні кароткатэрміновых рублёвых аблігацый Нацбанка з тэрмінам абарачэння, роўным 7 дзён, попыт на іх склаў 172,43 млн BYN, што перавысіла попыт на аўкцыёне 22 лістапада, роўны 122,93 млн BYN. Сума размяшчэння была практычна той жа і склала 40 млн BYN. А сярэднеўзважаная стаўка апусцілася да 8,1993% гадавых з 8,6439% на папярэднім аўкцыёне.

Нацбанк на гэтым тыдні прыняў новыя захады, якія, як мяркуюць у банку, павінны паскорыць тэмпы дэдалярызацыі краіны. А менавіта, з 1 студзеня 2018 года павялічваецца нарматыў адлічэнняў банкаў і нябанкаўскіх крэдытна-фінансавых арганізацый у фонд абавязковых рэзерваў ад прыцягнутых сродкаў у замежнай валюце з 15% да 17%. А з 1 снежня 2017 года зніжаны стаўкі для стала даступных і двухбаковых аперацый падтрымкі ліквіднасці банкаў у беларускіх рублях з 13% да 12% гадавых.

У Нацбанку мяркуюць, што гэта падвысіць прывабнасць аперацый у беларускіх рублях у параўнанні з валютнымі, і замацуе станоўчую тэндэнцыю зніжэння дзелі валютных дэпазітаў. Тэндэнцыя даволі слабая: дзель валютных укладаў у агульнай структуры дэпазітаў паменшылася да 67,9% у кастрычніку 2017 гады з 76,2% у студзені 2016 года.

Надзеі Нацбанка наўрад ці спраўдзяцца, бо наперадзе нас чакае, хутчэй за ўсё, паслабленне беларускага рубля, што панізіць прывабнасць беларускага рубля. У лістападзе ён і так патаннеў у дачыненні да еўра на 3,9%, у дачыненні да даляра - на 1,9%, і ў дачыненні да расейскага рубля - на 1,1%.

На наступным тыдні чакаецца працяг росту вартасці валютнага кошыка ў інтэрвале 0,5-1%.