ІП: Дэкрэт №7 - дамоклаў меч над дырэктарамі

«Лібералізацыйны» дэкрэт пагражае ператварыць кожную праверку ў вялікі штраф.

Бізнэс звяз прадпрымальнікаў і наймальнікаў імя прафесара М. С. Куняўскага накіраваў на адрас Мінэканомікі ліст з просьбай растлумачыць норму аб узмацненні адказнасці кіраўніка, прынятую нядаўна падпісаным дэкрэце №7 аб «развіцці прадпрымальніцтва», піша tut.by.

Рада нагадала, што на этапе падрыхтоўкі дэкрэта бізнэс грамадскасць пярэчыла супраць узмацнення адказнасці кіраўніка. Размытая фармулёўка пра «належную арганізацыю дзейнасці суб'екта гаспадарання, што выключае прычыненне шкоды дзяржаўным або грамадскім інтарэсам, навакольнага асяроддзі, жыцця, здароўю». Тым не менш норма засталася ў дакуменце, і цяпер за яе парушэнне дырэктарам пагражае штраф сумай ад 10 да 200 базавых адзінак (1 БВ - 23 рублі).

З дэкрэта №7: «Непрыняцце кіраўніком - юрыдычнай асобай неабходных захадаў для належнай арганізацыі дзейнасці гэтай юрыдычнай асобы ў адпаведнасці з устаноўленым заканадаўствам патрабаваннямі, што пацягнула прычыненне шкоды дзяржаўным або грамадскім інтарэсам, навакольнаму асяроддзю, жыццю, здароўю, правам і законным інтарэсам грамадзян, калі ў гэтай дзеі няма складу іншага адміністрацыйнага правапарушэння або складу злачынства, цягне накладанне штрафу сумай ад дзесяці да двухсот базавых адзінак».

У прэс-рэлізе бізнэс-звязу адзначана, што згодна з Працэсуальна-выканаўчым кодэксам Беларусі аб адміністрацыйных правапарушэннях, складаць пратаколы аб адміністрацыйным правапарушэнні могуць службовыя асобы 72 органаў, арганізацый, інспекцый, а таксама іншыя асобы. Пры гэтым незразумела, як кантралёры будуць вызначаць «належную арганізацыю дзейнасці» суб'екта гаспадарання і тое, якія меры павінен быў прыняць кіраўнік для «належнага» кіравання. Таксама бянтэжыць значная разбежка магчымага штрафу.

«З прыняццем дэкрэта №7 над дырэктарамі навіс дамоклаў меч, бо кожная выбарачная праверка можа скончыцца вялікім штрафам, прычым праз незразумелыя патрабаванні. Тэрмін «належная арганізацыя дзейнасці» будзе трактавацца кантралёрам зыходзячы з уласнага ўзроўню развіцця і разумення нарматыўных прававых актаў», - асцерагаецца дырэктарка і сустаршыня БСПН імя Куняўскага Жанна Тарасевіч.

Нават невыкананне гучнага патрабавання забяспечыць сярэдні заробак 500 даляраў у эквіваленце можа быць расцэнены як падстава прыцягнуць дырэктара да адказнасці, - мяркуюць экспэрты бізнэс-звязу.

На думку БСПН, пункт 6 дэкрэта №7 не адпавядае закону «Аб нарматыўных прававых актах», згодна з якім заканадаўчыя тэрміны павінны быць зразумелымі і адназначнымі. Каб пазбегнуць адвольнай інтэрпрэтацыі, бізнэс-звяз прапануе распрацаваць нарматыўны прававы акт, які будзе тлумачыць прымяненне норм дэкрэта №7, растлумачыць паняцці «належная арганізацыя дзейнасці» і «непрыняцце кіраўніком юрыдычнай асобы неабходных захадаў для належнай арганізацыі дзейнасці».