Дональд Туск: Будзем патрабаваць ад краін G7 падаўжэння санкцый супраць РФ
1- 26.05.2017, 14:31
- 22,237
Старшыня Еўрапейскай Рады выразна пазначыў пазіцыю ЕЗ.
Дональд Туск заявіў, што ЕЗ мае намер патрабаваць ад краін «Вялікай сямёркі» прадаўжаць палітыку санкцый у дачыненні да Расеі за анэксію Крыму і падтрымку сепаратыстаў ва Украіне, паведамляе «Радыё Польшча».
Сёння, 26 траўня, Дональд Туск возьме ўдзел у саміце «Вялікай сямёркі», які пройдзе ў Таарміна на Сіцыліі.
Падчас брыфінгу Дональд Туск адзначыў, што з моманту папярэдняга саміту G7 у Японіі сітуацыя ва Украіне не змянілася, Расея ж прадаўжае ігнараваць Менскія пагадненні. Таму, са слоў Туска, ЕЗ не бачыць прычынаў для касавання або паслаблення санкцыяў.
На пытанне, ці згодныя з гэтым меркаваннем ЗША, кіраўнік Еўрапейскай Рады адказаў неадназначна.
«Падчас размовы з Дональдам Трампам у мяне склалася ўражанне, што ён гатовы да больш істотнага ўдзелу ў развязанні канфлікту ва Украіне, што, зрэшты, не азначае, што нашы меркаванні аб ролі РФ у гэтым канфлікце сыходзяцца», - сказаў кіраўнік Еўрапейскай Рады.
Ён таксама згадаў трагічную сітуацыю ў Сірыі. Ад імя Еўрапейскага Звязу Дональд Туск усклаў віну за вайну ў гэтай краіне на Іран і Расею, якія падтрымліваюць рэжым прэзідэнта Асада.