«Белкельме» прызналі банкрутам

Беларуска-гішпанскае прадпрыемства не вытрымала канкурэнцыі на рынку спартыўнага абутку.

Эканамічны суд Берасцейскай вобласці прызнаў банкрутам закрытае акцыянернае таварыства супольнага беларуска-гішпанскага прадпрыемства «Белкельме», паведаміла карэспандэнту БелТА афіцыйная прадстаўніца суда Вольга Пішчык.

Суд прыняў да ўвагі хадайніцтва агульнага сходу крэдытораў аб ліквідацыі завінавачанага прадпрыемства і пагадзіўся з довадамі крызіснага кіраўніка пра тое, што аднавіць платаздольнасць ЗАТ не магчыма. У дачыненні да завінавачанага прадпрыемства пачатае ліквідацыйнае справаводства тэрмінам да 1 лютага 2018 года.

На судзе было адзначана, што закрыццё прадпрыемства не пацягне непрыемных сацыяльных наступстваў для Белаазёрску. Практычна ўвесь працоўны калектыў «Белкельме», а гэта 240 чалавек, пераведзены на фабрыку «Вердзімар», якой Берасцейскі аблвыканкам перадаў маёмасны комплекс СП. На ліквідуемым прадпрыемстве засталося ўсяго 22 чалавекі, з якіх 12 занятыя ў гандлі.

Конкурсная вытворчасць у дачыненні да «Белкельме» была адкрытая 30 студзеня 2017 года. Тады ж справу аб банкруцтве пачалі рыхтаваць да судовага разбору. Пры аналізе фінансавага стану прадпрыемства за 2015-2016 гады было выяўлена, што яго неплатаздольнасць мае ўстойлівы характар. ЗАТ не ў стане выконваць свае кароткатэрміновыя аплатныя абавязанні (доўгатэрміновыя абавязанні ў яго адсутнічаюць). У ліку асноўных прычын, якія спрыялі развіццю негатыўнай сітуацыі на прадпрыемстве, адзначалася набытае 15 гадоў таму састарэлае абсталяванне і адсутнасць абарачальных сродкаў. Адгружаная спажыўцам у 2014-2015 гадах прадукцыя была вернутая на склад. Гаворка ідзе пра 52 тысячы пар абутку. З іх па гэты дзень не рэалізавана больш за 46,5 тысяч пар.

«Звязаны жорсткімі тэхналагічнымі рамкамі вытворчасці (абсталяванне атрымана ад гішпанскага акцыянера) завінавачанае прадпрыемства не здолела паскорыць абнаўленне асартыменту ў адпаведнасці са змяненнем попыту на рынку. Гэтая акалічнасць негатыўна паўплывала на канкурэнтаздольнасць выпускаемай на прадпрыемстве прадукцыі. Пазіцыянаванне брэнда «Белкельме» як «абутак для спорту і актыўнага адпачынку з натуральнай скуры» страціла сваю актуальнасць», - адзначана ў вызначэнні суда.

ЗАТ СП «Белкельме» створана ў 1993 годзе, першая партыя красовак выйшла з яго цэхаў у 1995-м. Заснавальнікамі прадпрыемства сталі Нацыянальны алімпійскі камітэт Беларусі, Kelme International A.O. (Іспанія), ААТ «Бабруйскі гарбарны камбінат».