Соф'я Лапіна: Не хачу быць дэкарацыяй на чужым свяце жыцця

Фіналістка нацадбору на «Еўравізіі» знялася на знак пратэсту супраць парушэння правілаў конкурсу.

16 лютага ў жывым эфіры «Еўрарадыё» фіналістка нацыянальнага адбору Соф'я Лапіна адмовілася ад далейшага ўдзелу ў конкурсе. Такім чынам яна пратэстуе супраць абыякавасці Белтэлерадыёкампаніі да парушэнняў правілаў конкурсу ўкраінскім спеваком Мікітам Аляксеевым.

«Мы хочам паведаміць, што ўсё ж надумалі зняцца з фіналу адборачнага тура. Я, як артыстка, якая паважае сябе, не хачу быць дэкарацыяй на чужым свяце жыцця», - заявіла Соф'я.

Са слоў прадусара Соф'і Сяргея Кіма, Белтэлерадыёкампанія вядзе няшчырую гульню, і ўдзельнічаць у ёй не было мэтай спявачкі.

Соф'я Лапіна павінна выступіць у фінале адбору пад чацвёртым нумарам. Цяпер у канцэрце возьме ўдзел 10 артыстаў.

Як паведамлялася раней, шасцёра фіналістаў (сярод іх і Соф'я Лапіна) адправілі прыватны ліст кіраўніцы адбору Вользе Шлягер. У ім яны выказалі прэтэнзіі да Белтэлерадыёкампаніі, якая, на іх думку, не рэагуе на відавочныя парушэнні рэгламенту конкурсу з боку ўкраінскага спевака Мікіты Аляксеева. У лісце артысты прыстрашылі, што не падпішуць дамовы на ўдзел у фінале, калі кіраўніцтва адбору не дасць зразумелага адказу з нагоды сітуацыі.