Пратэст пад Берасцем: Усё здолеем, бо ўсе жыхары супраць завода

Бунт берасцейцаў супраць будаўніцтва небяспечнага акумулятарнага завода прадаўжаецца.

Пратэст супраць будаўніцтва акумулятарнага завода пад Берасцем прадаўжаецца. Супраць патэнцыйна небяспечнага аб'екта сабралі больш за 15 тысяч подпісаў, паведамляе «Белсат».

Пазіцыя ж уладаў застаецца нязменнай: завод прайшоў усе неабходныя экспэртызы і будзе цалкам бяспечным.

Падпісацца супраць будаўніцтва акумулятарнага завода 21 студзеня можна было ў дзевяці месцах у Берасці.

«Збіраем подпісы за забарону будаўніцтва акумулятарнага завода», - кажа Ігар Маслоўскі, актывіст БСДП (Грамада).

Ягоны аднапартыец Сяргей Мазан адзначае:

«Таму што такія рэчы, як будаўніцтва акумулятарнага завода, трэба абмяркоўваць з людзьмі, якія жывуць побач з ім. Гэта не было зроблена, а цяпер робіцца няшчыра - проста каб адкараскацца».

Сайт Charter97.org неаднаразова паведамляў пра пратэсты супраць будаўніцтва берасцейскага акумулятарнага завода «iPower» бізнэсоўца Віктара Лемяшэўскага. Жыхары Берасцейшчыны, з якімі правялі абмеркаванне толькі пасля шырокага асвятлення тэмы СМІ, не згаджаюцца з высновамі дзяржаўных эколагаў з нагоды бяспекі свінцовых выкідаў. Яны патрабуюць правесці незалежную экспэртызу або спыніць будаўніцтва завода.

На сходзе ў вёсцы Тэльмы-1 уласнік завода Віктар Лемяшэўскі пераконваў, што ён пакажа ўсе дакументы, якія датычацца экалагічнай бяспекі праекта, а таксама прапаноўваў зазірнуць і на іншыя ягоныя заводы. Праўда, ні ў Белаазёрску, ні ў Пінску блогерам не былі радыя.

Да таго ж, як высветлілася, падманулі неабыякавых берасцейцаў не толькі на словах, але і ў лічбах.

«Нам казалі, што тры кілаграмы выкідаў на год будзе. Але яны няправільна перавялі секунды ў гады і грамы ў тоны! Адпаведна, калі самастойна ўзяць іх пратакол і перавесці гэтыя лічбы, мы бачым, што выходзіць там 12 кілаграмаў [выкідаў]. Гэта значыць, у чатыры разы падманваюць!» - абураецца валанцёр Міхаіл Галуза.

А гэта, вядома, абурае жыхароў Берасця.

«Ёсць жа зоны адчужэння - нашы так званыя эколагі кажуць, што там сеяць можна, саджаць. Ну дык няхай яны там заводы гэтыя паставяць!» - кажа жыхарка горада.

Іншая берасцейка адзначае:

«Вядома, што атрымаецца. Галоўнае - захацець. Бо людзі супраць. Усе!».

Выразнага адказу ўладаў на пытанні берасцейцаў, як можна спыніць праект ці хаця б перанесці патэнцыйна небяспечны завод далей, дагэтуль няма. А значыць, што і подпісаў «супраць», і абураных грамадзян будзе з'яўляцца толькі больш.

«Людзі вельмі актыўна падпісваюцца. Гэта значыць, амаль кожны мінак падыходзіць і ставіць подпіс, ці кажа, што ўжо паставіў і праходзіць далей», - распавядае актывіст Аляксандр Кабанаў.