Як Лукашэнка напружыў амбасадара Пакістана

Што было не так у словах правадыра.

З нагоды заканчэння дыпмісіі ў Беларусі пасол Пакістана Масуд Хан Раджа сустрэўся з Аляксандрам Лукашэнкам. «Салідарнасць» тлумачыць, што было не так у словах правадыра.

«Прашу, як будзе магчымасць, перадаць Навазу Шарыфу самыя добрыя зычэнні»

Чаму пасла Пакістана павінна была напружыць гэтая просьба правадыра Беларусі, у якога «склаліся вельмі добрыя стасункі з Навазам Шарыфам»?

Мала таго, што паўгода таму палітыка адхілілі ад пасады прэм'ер-міністра паводле абвінавачвання ў карупцыі. З канца мінулага года суд разглядае справу ў дачыненні да Наваза Шарыфа і ягоных дзяцей.

Так званае «Панамскага дасье» паказала, што дзеці былога прэм'ера валодалі афшорных фірмамі. Сам Наваз Шарыф фігуруе ў трох з чатырох эпізодаў справы: яму ставіцца ў віну валоданне актывамі, якія перавышаюць яго крыніцу даходу як афіцыйнай службовай асобы.

У падарунак - трактар ад Лукашэнкі

Прэса піша, што ў былога прэм'ера сапраўды сур'ёзныя праблемы. Шарыф на радзіме апынуўся ў няміласці і пад агнём крытыкі. Можна ўявіць, што адчувае пасол Пакістана, якога Лукашэнка папрасіў перадаць таму вітанні.

«Нават без напружання мы зможам перасягнуць гэтую мяжу (тавараабарачэння на $1 млрд)»

Не менш дзіўна прагучала і гэтая заява правадыра Беларусі. Наогул, гэтую мэту Лукашэнка і Шарыф паставілі яшчэ блізу трох гадоў таму (!) і збіраліся дасягнуць яе да 2019-2020 года. Але пакуль тавараабарачэнне боўтаецца ў раёне нязначных 60 млн даляраў. Аптымізму Лукашэнкі застаецца толькі пазайздросціць.

Яшчэ адзін паказальны факт: пасля сустрэчы Лукашэнкі з паслом Пакістана дзяржаўныя СМІ выдалі станоўчую статыстыку. У студзені-лістападзе 2017 года тавараабарачэнне паміж краінамі павялічылася на 30% і склала $65,5 млн.

Штука ў тым, што гэты аб'ём усяго толькі паўтарае ўзровень 2012 года. Пасля таго, як Лукашэнка і Шарыф узяліся развіваць супрацоўніцтва (падчас узаемных візітаў было падпісана аж 80 дакументаў), наблізіцца да гэтай лічбы доўга не маглі...