Вялікія грузавікі не будуць пускаць у Польшчу чатыры дні
- 30.10.2018, 21:22
- 10,794
Забарона звязаная з правядзеннем у краіне мерапрыемстваў, прысвечаных Дню памяці продкаў і 100-годдзю незалежнасці Польшчы.
Часовая забарона на рух грузавікоў агульнай масай звыш 12 тон на дарогах агульнага карыстання Рэспублікі Польшча ўводзіцца на 31 кастрычніка, 1, 10 і 11 лістапада.
Абмежаванне не распаўсюджваецца на транспартныя сродкі, якія перавозяць небяспечныя грузы, на прадукты, якія хутка псуюцца, жывёлін і аўтобусы міжнароднага кірунку, паведамілі ў ДПК Беларусі.
Гэтая забарона звязаная з правядзеннем у Польшчы мерапрыемстваў рэлігійнага характару, прысвечаных Дню памяці продкаў (31 кастрычніка і 1 лістапада), а таксама святочных мерапрыемстваў, прымеркаваных да 100-годдзя незалежнасці Польшчы (11 лістапада).
Згодна з загадам міністра транспарту Рэспублікі Польшча, поўная забарона на рух вялікіх грузавікоў, аўтацягачоў будзе дзейнічаць (паказаны беларускі час):
31 кастрычніка 2018 года - у перыяд з 19.00 да 23.00;
1 лістапада 2018 года - у перыяд з 9.00 да 23.00;
10 лістапада 2018 года - у перыяд з 19.00 да 23.00;
11 лістапада 2018 года - у перыяд з 9.00 да 23.00.
Таксама працягваецца мадэрнізацыя ў польскіх аўтадарожных пунктах пропуску «Кузніца» (з беларускага боку «Брузгі») і «Баброўнікі» (з беларускага боку «Бераставіца»).