Арамнаў уключаны ў склад нацыянальнай каманды Беларусі на чэмпіянат свету

Алімпійскі чэмпіён Пекіна заяўлены ў катэгорыі 109 кг.

Алімпійскі чэмпіён Пекіна 2008 года Андрэй Арамнаў возьме ўдзел у чэмпіянаце свету ў цяжкай атлетыцы, які стартуе ў Ашхабадзе, паведамляе БелТА.

Нацыянальная каманда сёння ўночы адправіцца ў сталіцу Туркменістана. Андрэй Арамнаў заяўлены ў катэгорыі 109 кг.

Як адзначылі ў трэнерскім штабе, атлет, які доўгі час не браў удзел у афіцыйных міжнародных стартах, на зборах у алімпійскім комплексе «Стайкі» выканаў сур'ёзны аб'ём працы пры падрыхтоўцы да сусветнага форуму і здольны ўвайсці ў васьмёрку наймацнейшых паводле вынікаў турніру.

У чэмпіянаце возьме ўдзел і сярэбраная прызёрка Алімпіяды ў Рыа-дэ-Жанейра Дар'я Навумава. Прапускае гэты старт адзін з лідараў мужчынскай каманды Вадзім Стральцоў. Першыя ўзнагароды чэмпіянату свету ў цяжкай атлетыцы ў Ашхабадзе будуць разыграныя 2 лістапада, а закончацца спаборніцтвы 10 лістапада.

Нагадаем, Арамнаў быў асуджаны і не меў права пакідаць Беларусь.