Здымак беларуса ўвайшоў у топ-50 найлепшых вясельных фота 2018 года
- 21.12.2018, 20:21
- 21,591
На суд прафесійнага журы было даслана амаль 10 тысяч фатаграфій з розных краін свету.
Здымак Сяргея Лапкоўскага з Менска ўвайшоў у лік пераможцаў конкурсу Best Wedding Photography Contest, які праводзіцца вясельным інтэрнэт-парталам junebugweddings.com, паведамляе belmir.by.
На суд прафесійнага журы было даслана амаль 10 тысяч фатаграфій з розных краін свету. Суддзі выбралі толькі 50 з іх, якія і ўвайшлі ў спіс «найлепшых з лепшых».
Цяпер гэтая галерэя з працай беларуса ў тым ліку патрапіла на старонкі шэрагу буйных інтэрнэт-СМІ свету.
Як распавёў Сяргей belmir.by, здымак зроблены на вяселлі падчас збораў нявесты. «Удзельнічаю ў розных міжнародных конкурсах вясельнай фатаграфіі, таму наважыў адправіць свае працы і на гэты», - дадаў ён.
Лапкоўскі - прафесійны фатограф, які спецыялізуецца на вясельных, партрэтных і сямейных здымках, любіць здымаць love story.
«Мой стыль вясельнай здымкі - нязмушаная пастаноўка і вясельны фотажурналізм», - паведамляе ён на сваім сайце.
Таксама тут сказана, што Сяргей - неаднаразовы прызёр і пераможца міжнародных прэмій Fearless Awards, ISPWP Awards і беларускіх конкурсаў.
Між іншым, як паінфармаваў фатограф ужо на сваёй старонцы ў Instagram, гэты ж чорна-белы здымак прынёс яму трохі раней пятую ўзнагароду Fearless.