БГК падолеў найлепшую каманду свету
2- 25.02.2018, 16:13
- 10,912
Берасцейскія гандбалісты сенсацыйна перамаглі ПСЖ і выйшлі ў плэй-оф Лігі чэмпіёнаў.
ПСЖ - гэта не толькі футбольны клуб, за які выступаюць Нэймар ды іншыя зоркі. У гандболе парыжцаў таксама ўважаюць ці не за галоўны клуб. І гуляюць там найлепшыя спартоўцы планеты. Пра Ніколя Карабаціча вы напэўна чулі, нават калі надта за гандболам не сочыце.
Дык вось, ПСЖ проста цяпер - найлепшая каманда Еўропы разам з «Вардарам». Менавіта гэтыя каманды гулялі ў фінале Лігі чэмпіёнаў мінулага года. Македонцы тытул здабылі, але ў новым сезоне лепш выступае Пары Сэн-Жэрмэн. Французы да матчу з БГК страцілі балы толькі адзін раз, 30 верасня саступіўшы «Фленсбургу», піша «Трибуна».
У суботу, у рамках перадапошняга тура групавога этапу, ПСЖ прыехаў у Берасце. БГК, дарэчы, упершыню ў сезоне прадаў усе квіткі і сабраў аншлаг. Матч наведалі 3 740 гледачоў - роўна столькі змяшчае спарткомплекс «Вікторыя».
З першых хвілін матч пайшоў не паводле плану фаварытаў. Берасцейцы павялі 4:0 і давялі першы тайм да ўпэўненай перамогі - 19:13.
Але ў другой палове ПСЖ прадэманстраваў клас. Французы спакойна адыграліся і, здавалася, возьмуць сваё. Але «мяшкоўцы» не далі спаборнікам адарвацца ў ліку. А на апошняй хвіліне гаспадары і зусім выйшлі наперад - 29:28.
А затым пачалася гульня нерваў. Зваротная атака парыжцаў закончылася недакладным кідком. Здавалася, перамога ў руках БГК. Але праз дурную памылку (пас галкіперу кваліфікавалі як пасіўную атаку) берасцейцы страцілі валоданне і ледзь не выпусцілі перамогу - Адама Кейта закінуў, але праз секунду пасля фінальнай сірэны. Лік застаўся 29:28 на карысць БГК.
Такую эмацыйную развязку варта паглядзець самім.
Дарэчы, галоўнай зоркай матчу стаў не Ніколя Карабаціч, а «мяшковец» Петар Джорджыч - на ягоным рахунку аж 10 закінутых мячоў. Для гандбола гэта нерэальна шмат.