Бацька аднаго з гарнякоў: Быў на рудніку да гадзіны ночы, ніякага скутку

Пошукі гарнякоў не спыняюцца ні на хвіліну.

Родныя Дзмітрыя Валькова, аднаго з гарнякоў, які знаходзіцца пад заваламі ў рудніку трэцяга рудакіраўніцтва «Беларуськалія», распавялі, што сын працуе на прадпрыемстве шэсць гадоў. Дзмітрыю 33 гады. У пятніцу, 9 сакавіка, ён заступіў на змену, інфармацыі пра яго ў сваякоў пакуль няма, піша tut.by.

Нагадаем, 9 сакавіка ў рудніку трэцяга рудакіраўніцтва «Беларуськалія» адбылося надзвычайнае здарэнне - пад заваламі ў шахце апынуліся два работнікі.

«Відавочцы кажуць, пад 17.40 у шахце на трэцім рудніку адбыўся выкід газу і абрынанне пароды. Заваліла камбайн з двума работнікамі», - распавёў чытач.

- Не знайшлі іх яшчэ, - распавёў Анатоль бацька Дзмітрыя, вечарам у суботу. - Там яшчэ нічога не вядома, таму ўсе маўчаць. Мы самі тэлефануем тым, хто можа хоць нешта ведаць. Даведаемся. Учора ўвечары, калі ўсё гэта здарылася, я быў на рудніку. Быў да гадзіны ночы. А карысці ... ніякай. Калі іх знойдуць, нам паведамяць.

Са слоў бацькі, ніхто з кіраўніцтва прадпрыемства з імі пакуль не звязваўся. Асноўную інфармацыю сям'я атрымлівае ад знаёмых, якія працуюць на прадпрыемстве.

- Я проста тэлефаную ў «лямпавую», дзе гарнякам выдаюць лямпы, - прадаўжае мужчына. - Там рабочыя павінны быць у курсе, пытаюся.

З роднымі Максіма Іванова, кажа Анатоль, яны не звязваліся.

Раніцай і ўдзень журналісты спрабавалі звязацца з прадстаўнікамі прадпрыемства. На тэлефонах, пазначаных на сайце, жаночы голас прапанаваў звярнуцца па інфармацыю ў панядзелак.

Раней гарнякі, якія просяць не называць іх імёнаў, расказвалі: на месцы, дзе здарылася НЗ, у той момант магло быць тры чалавекі - машыніст камбайна, рабочы і зменны майстар. Майстар, тлумачаць, адказны адразу за некалькі комплексаў, падчас здарэння ён быў на іншым аб'екце.

- Ён быў на іншай панэлі, у іншай частцы тунэлю. Пад канец змены там выбіла электраэнэргію, і майстар, мабыць, стаў вяртацца туды, дзе працавалі Дзмітрый і Максім, - распавядае адзін з гарнякоў. Ён не быў на месцы здарэння, але пры нас тэлефанаваў калегам, якія там былі, але адмовіліся размаўляць са СМІ. - У майстра з сабой быў датчык метану, прыбор стаў паказваць метан. Дыхаць было немагчыма, ён падключыўся да самаратавальніка і прадоўжыў ісці да хлопцаў. Ён убачыў, што тунэль цалкам закіданы, хлопцаў не відаць, і паведаміў дыспетчару.

Гарнякі кажуць, што ў даўжыню парода абрынулася прыкладна на 50 метраў.

У інтэрв'ю тэлеканалу АНТ гендырэктар прадпрыемства Іван Галаваты паведаміў, што адбылося раптоўнае абрынанне парод даху, з вялікай інтэнсіўнасцю і з выдзяленнем газу.

Са слоў кіраўніка, пошукі гарнякоў не спыняюцца ні на хвіліну.

- На жаль, нейкай асаблівай тэхнікі выкарыстаць немагчыма, адбываецца ўручную зачыстка рыдлёўкамі, - растлумачыў сітуацыю Іван Галаваты. - Складанасць у тым, што абмежаваная прастора. Шырыня выпрацоўкі складае ўсяго толькі 3,8 метра, вышыня - 3 метра. Магчымае размяшчэнне не больш за 5 чалавек.

Нагадаем, як паведамілі на «Беларуськаліі», 9 сакавіка 2018 года на падземным горай дзялянцы №10 рудніка 3-га рудакіраўніцтва, у змену з 11.50 да 18.50, пры выкананні комплексам ПКС-8 №4 высечкі заходняга слупа гарызонту -620 м адбыўся раптоўны выкід солі і газу.

Інтэнсіўнасць выкіду склала блізу 600 м³ горнай масы. Праходчы камбайн і самаходны вагон апынуліся цалкам засыпаны выкінутай пародай. Пад завал патрапілі машыніст горных машын Максім Анатольевіч Іваноў, 1973 года нараджэння, і горнарабочы вычышчальнага забою Дзмітрый Анатольевіч Валько, 1985 года нараджэння. Горнавыратавальнікі і службы рудніка вядуць працы для расчыскі завалаў. На гэты час працоўныя не выяўленыя. Створана камісія для расследавання прычын і абставін раптоўнага выкіду.