4 красавiка 2020, Субота, 13:17
Заставайся дома!
Рубрыкі

У пенсійным фондзе ўтварылася дзірка

21
У пенсійным фондзе ўтварылася дзірка
ФОТА: TUT.BY

Наяўнасць праблемы з бюджэтам ФСАН у Беларусі не раз пацвярджалі і міжнародныя экспэрты.

Расходы Фонду сацабароны насельніцтва летась склалі 12,2 мільярда рублёў, а сума «дзіркі» ў ім, якую давялося кампенсаваць за кошт сродкаў бюджэту - за 1,2 млрд рублёў. Як адзначана ў профільным часопісе «Фінансы, улік, аўдыт», гэта на 184 млн рублёў менш, чым ў 2016 годзе. Аб гэтым піша tut.by.

«Дзірку» ў ФСАН, з якога выплачваюцца пенсіі, стыпендыі і дапамогі, даводзіцца затыкаць субвенцыямі з бюджэту ўжо традыцыйна, і незбалансаванасць ФСАН Мінфін уважае за адну з асноўных пагроз бюджэтнай устойлівасці ў кароткатэрміновым перыядзе.

Сёлета з рэспубліканскага бюджэту ў бюджэт ФСАН запланаваныя субвенцыі ўжо ў суме 1,416 рублёў. Гэта спатрэбіцца для забеспячэння суадносін сярэдняй сумы пенсіі па ўзросту і сярэдняга заробку работнікаў у рэспубліцы не ніжэй за ўстаноўленае парогавае значэнне (40%). Цяпер да парога мы не дацягваем. Сярэдняя сума пенсій па ўзросце ў студзені 2018 года склала 323,1 рубля, ці 36,6% ад сярэдняга заробку, хоць яшчэ год таму суадносіны былі больш спрыяльным - 41,2%. Пры гэтым пенсіі ў Беларусі у 2018 годзе пералічаць усяго адзін раз.

Як раней паведамлялася, Беларусі нездарма ў 2016-м годзе давялося пайсці на павелічэнне пенсійнага ўзросту - дэфіцыт фонду вымушаў або адважвацца на такі непапулярны захад, або замарожваць, а то і зніжаць сумы выплат. Паэтапнае падвышэнне пенсійнага ўзросту да 58 гадоў для жанчын і 63 - для мужчын пачатае з 1 студзеня 2017 года. Пры гэтым пакуль суадносіны пенсіянераў і працоўных прыкметна не змянілася: 597 на 1000 працуючых у студзені гэтага года супраць 598 год таму.

Наяўнасць праблемы з бюджэтам ФСАН у Беларусі не раз пацвярджалі і міжнародныя экспэрты. МВФ, напрыклад, настойліва рэкамендаваў уладам прадоўжыць пенсійныя рэформы, каб ліквідаваць пенсійны разрыў пасля 2022 года. Сярод захадаў, прапанаваных экспэртамі, - паступовае падвышэнне парога выхаду на заслужаны адпачынак да 65 гадоў і для мужчын, і для жанчын.