«Кіроўцу Touareg ніхто не падпіраў»: з'явілася новае відэа язды па газону ў Менску

Канфлікт на вуліцы Голубева выклікаў вялізны рэзананс.

Аўтамабіль ехаў па зялёнай зоне, гэта стаў здымаць на відэа пешаход. Кіроўца выйшаў з аўто і, як ён сам заявіў, хацеў забраць тэлефон.

Пешаход выкарыстаў газавы балончык. Аўтамабіліст не стрымаўся, стаў груба выказвацца ў адрас апанента, а пасля ўсяго сказанага зняў перад ім штаны.

Услед за публікацыяй абедзвюх версій здарэння пешаход, наш чытач з нікам 1639441, даслаў карэспандэнту Onliner.by новае відэа, каб праясніць сітуацыю з паркоўкай у двары.

Каментары бакоў. Коратка

Пешаход:

«Жылтаварыства стараецца, кусцікі садзіць, газон, а потым некаторыя кіроўцы дзеля свайго камфорту з абыякавасцю ставяцца да ўсяго. Кіроўца Volkswagen мог праехаць, не парушаючы правілаў дарожнага руху, - гэта не адняло б у яго больш часу. Але ён наважыў праехаць праз тратуар і газон. Я думаю, ён проста не хацеў плаціць штраф за парушэнне ПДР. Праз гэта пачаўся канфлікт. Каб сябе абараніць, я выкарыстаў газавы балончык».

Кіроўца:

«Чалавек мяне правакаваў. Ён пачаў здымаць тады, калі я стаяў на паркоўцы і там тры машыны мяне падперлі. Я не мог па-іншаму выехаць, мне прыйшлося заехаць на зялёную зону. Я памятаю, як я хацеў выйсці і сказаць: «Выбачайце, калі ласка, што так атрымалася». Але выйшла так, што я хацеў забраць тэлефон, а ён мяне «пырснуў» у той момант».

Відэа з камеры назірання

Пасля публікацыі да карэспандэнта Onliner.by звярнуўся пешаход, які ўдзельнічаў у гэтым канфлікце, - наш чытач з нікам 1.639.441.

- У мяне ёсць відэа з камеры назірання, на якой бачна, як Volkswagen Touareg заязджае напярэдадні вечарам праз газон на тратуар. І, адпаведна, раніцай ён гэтак жа і выязджаў, і ніхто яго не прыпіраў, - распавёў суразмоўца. - Проста мяне вельмі абурыла яго пазіцыя і недарэчныя спроба неяк апраўдацца замест простых прабачэнняў. Тым больш што ён робіць з сябе ахвяру.

На запісу відаць, як аўтамабіль, сапраўды падобны на Volkswagen Touareg, па зялёнай зоне заязджае на «пятачок», дзе паркоўка забароненая, - гэта тратуар. Вакол прыпаркаваныя іншыя машыны. Гэта значыць кіроўца красоверу свядома рухаўся па зялёнай зоне, калі заязджаў на гэтае месца, пакінуў аўтамабіль на тратуары і мог усведамляць, што, імаверна, выязджаць яму давядзецца таксама па зялёнай зоне.

- Кіроўцу Touareg ніхто не падпіраў: ён заехаў на тратуар праз газон, уласна, гэтак жа і выязджаў, - адзначыў чытач.

Пра ўжыванне балончыка

Суразмоўца таксама растлумачыў сваё рашэнне ўжыць газавы балончык.

- Балончык пярцовы «Шпага», 100 мл. Час бесперапыннага распылення - 6 секунд. Пры жаданні можна было развеяць яго цалкам, але я пырснуў ім ад сілы 1-1,5 секунды, бо ў мяне не было мэты як мага мацней нашкодзіць кіроўцу Touareg, а была толькі самаабарона. У міліцыю я не звяртаўся і не збіраўся туды ісці, акрамя як пакараць парушальніка па лініі ДАІ, - распавёў карыстальнік 1.639.441.

Ён таксама падкрэсліў, што не абразаў відэа і не рэдагаваў яго.

- Кіроўцу я ні ў якім разе не правакаваў да гэтага і нават не падыходзіў да яго. З нагоды паркоўкі на тратуары: вельмі часта на нашай вуліцы працуе эвакуатар, таму, мяркую, кіроўца Touareg так хітра і паркаваўся - каб яго аўто не змаглі эвакуіраваць, - выказаў меркаванне наш чытач.

У ДАІ Менска ўжо паведамілі, што паводле факта гэтага інцыдэнту прызначаная праверка, дзеянням удзельнікаў будзе дадзеная прававая ацэнка. Чалавек, які прадставіўся як кіроўца Volkswagen Touareg, заявіў, што мае намер звяртацца ў міліцыю.