Працоўныя з Баранавічаў: На заводзе зліквідавалі буфет, медпункт. Што далей?

На баранавіцкім камбінаце ЖБК пачаліся перамены, якія закранаюць інтарэсы працоўных.

Супрацоўнікі камбіната жалезабетонных канструкцый, які ў снежні мінулага года стаў філіялам ААТ «Крычаўцэментнашыфер», скардзяцца на тое, што пасля рэарганізацыі на прадпрыемстве пачаліся перамены, якія закранаюць інтарэсы работнікаў.

У пачатку года на камбінаце закрылі буфет, потым супрацоўнікаў пазбавілі датацый на харчаванне ў сталовай, а некалькі дзён таму перастаў працаваць медпункт, піша intex-press.by.

Работнікі камбіната ЖБК распавядаюць, што медпункт, які праіснаваў на прадпрыемстве шмат гадоў, размяшчаўся ў адміністрацыйным корпусе прадпрыемства і складаўся з некалькіх кабінетаў: стаматалагічнага, масажнага, працэдурнага ды іншых.

- У медпункце нам рабілі прышчэпкі, калі трэба, давалі лекі. У кожны момант супрацоўнікам можна было памераць ціск, тэмпературу, не кажучы ўжо аб наданні першай дапамогі ў выпадку чаго. Мы нават зубы маглі бясплатна палячыць, - кажа адзін з працаўнікоў камбіната ЖБК.

Са слоў суразмоўцаў, стаматолаг прыязджаў у медпункт завода некалькі разоў на тыдзень, а фельчар прымаў кожны дзень.

- Гэта было вельмі зручна. Забалела што-небудзь - табе адразу пігулку або кроплі дадуць, павязку, калі трэба, накладуць. А ў працэдурным кабінеце можна было і УВЧ, і кварцаванне зрабіць, - распавядае адная з супрацоўніц. - А цяпер, калі што здарыцца, давядзецца ў хуткую тэлефанаваць. Але пакуль яна даедзе праз два чыгуначныя пераезды, памерці можна.

«Навошта марнаваць грошы на лекі для нас?»

Суразмоўцы адзначаюць, што за апошні час на камбінаце закрылі не толькі медпункт, але і буфет. Са слоў людзей, ходзяць чуткі і пра запланаванае закрыццё сталоўкі.

- Нядаўна нам перасталі плаціць датацыі на харчаванне ў сталовай. Кажуць, саму сталовую хацелі закрыць адразу пасля далучэння, але пакуль гэтае пытанне адклалі, - адзначае адзін з супрацоўнікаў.

Чаму зачынілі медпункт і буфет, работнікі дакладна не ведаюць. Некаторыя кажуць, што такая пастанова з мэтай эканоміі прынятае ці кіраўніцтва ААТ «Крычаўцэментнашыфер», да якога далучылі камбінат ЖБК у канцы мінулага года, або холдынгу «Беларуская цэментная кампанія», часткай якога з'яўляецца «Крычаўцэментнашыфер», а адпаведна, і яго баранавіцкі філіял.

- Кіраўніцтва нашага завода цяпер амаль нічога не вызначае, усім кіруе «Крычаўцэментнашыфер» і «Беларуская цэментная кампанія». А ім навошта марнаваць грошы на лекі для нас? Мы ж далёка, - разважае адзін з мужчын. - Закрылі буфет, медпункт. Што далей?

Атрымаць аператыўны каментар у ААТ «Крычаўцэментнашыфер» і ў «Беларускай цэментнай кампаніі» не ўдалося.

Дарэчы, на сайце філіяла «Баранавіцкі камбінат жалезабетонных канструкцый» ААТ «Крычаўцэментнашыфер» дагэтуль размешчаная інфармацыя аб працы буфета, медпункта, а таксама аб датацыях на харчаванне, якія атрымліваюць супрацоўнікі.