Леанід Судаленка пра «справу прафзвязаў»: Рыхтуем пратэстныя акцыі ва ўсёй краіне

У Беларусі могуць з'явіцца палітвязні вельмі высокага калібру.

Пра гэта сайту Charter97.org заявіў прававы інспектар незалежнага прафзвязу радыёэлектроннай прамысловасці (РЭП) Гомельскай вобласці, лаўрэат прэміі «Хартыі-97» за 2017 год Леанід Судаленка ў каментары «справа прафзвязаў»:

- З матэрыялаў крымінальная справы супраць лідараў прафзвязу РЭП Генадзя Фядыніча і Ігара Комліка вынікае, што ім выстаўляюць эпізоды 2011-га года. У нас адразу ж узнікае лагічнае пытанне, калі ў следства была гэтая інфармацыя яшчэ тады, то чаму цэлых сем гадоў яна не падымалася? Бо «справа прафзвязаў» пачалася ў жніўні мінулага года. Менавіта тады, калі наш прафзвяз эфектыўна змагаўся са скандальным дэкрэтам аб «дармаедах». Мы тады вельмі плённа папрацавалі супраць гэтага дэкрэта, барацьба дала эфект і, на мой погляд, распачынаннем крымінальнай справы ўлады хочуць «ударыць па галаве» прафзвязу РЭП менавіта за яго актыўнасць.

- Як цяпер працуе незалежны прафзвяз?

- Наш прафзвяз ні на дзень не спыняе абарону простых рабочых ва ўсёй Беларусі. У той жа Гомельскай вобласці ўвесь час ідуць суды, дзе мы часта перамагаем, бо абараняем сацыяльна-эканамічныя правы кожнага канкрэтнага работніка, незалежна ад таго, дзе яны парушаюцца. Вядома ж, актыўная дзейнасць нашага прафзвязу не засталася не адзначанай ўладамі.

- Які ваш прагноз аб «справе прафзвязаў»?

- Санкцыі артыкула, якая выстаўляюцца Генадзю Фядынічу і Ігару Комліку, прадугледжваюць некалькі варыянтаў. Першы - абмежаванне волі да пяці гадоў, другі, больш жорсткае пакаранне - пазбаўленне волі тэрмінам да сямі гадоў. Мне складана сказаць, якім шляхам пойдзе ўлада.

Справа ў тым, што лідары нашага прафзвязу і так знаходзяцца пад падпіскай аб нявыездзе са жніўня 2017 года. Груба кажучы, Фядыніч, каб прыехаць у Гомель для сустрэчы з прафактывам павінен быў звяртацца па згоду следчага. Я ўжо не кажу пра выезд за мяжу. У іх наогул няма такой магчымасці!

У сувязі з гэтым, навошта цяпер уладзе, скажам так, ужываць «мяккае пакаранне»? З прычыны таго, што надта імкліва было выстаўленае канчатковае абвінавачванне і справа, па-за ўсялякімі сумневамі, будзе адпраўленая ў суд, прагназую жорсткі прысуд, звязаны з пазбаўленнем волі. Артыкул яшчэ прадугледжвае і канфіскацыю маёмасці. Для Фядыніча, якому ідзе 61-ы год, гэта будзе цяжкім выпрабаваннем.

Увогуле, надта магчымае з'яўленне ў краіне двух новых палітычных зняволеных вельмі высокага калібру. Магчыма, імі ўлады паспрабуюць таргавацца з Захадам ці, да прыкладу, з Міжнародным валютным фондам.

- Што цяпер мае намер рабіць прафзвяз РЭП?

- Мы цяпер ва ўсёй краіне заяўляем пратэстныя пікеты. Напрыклад, у Гомельскай вобласці заявілі блізу сямі пікетаў. Мы пратэстуем і заяўляем, што «справа прафзвязаў» носіць цалкам палітычны характар. Прававога ў ёй нічога няма.

Усё ляжыць на паверхні і, мяркую, толькі палітычная пастанова можа паўплываць на гэтую справу. Як цяпер сябе павядзе ўлада: будзе набіраць новых палітвязняў альбо адмовіцца ад гэтай ідэі. Паглядзім. Думаю, цягам найбліжэйшага месяца «справа прафзвязаў» будзе накіраваная ў суд. Мы будзем сачыць і прысутнічаць у судах.

Вядома, хацелася б, каб справядлівасць перамагла і з нашых лідараў знялі ўсе абвінавачванні. Вядома, што ніякіх сур'ёзных довадаў няма. Ксеракопіі нейкіх папер і не больш за тое. Будзем назіраць за гэтым працэсам.